ينتەرنەتتە شىعىس قازاقستاننىڭ بىرەگەي تابيعاتى تۋرالى ۆيدەو جاريالاندى
«شىعىس قازاقستاننىڭ تابيعاتى. ش ق و- عا ساياحات. ماۋسىم، 2017»، - دەپ جازدى اندرەي شەتينين.
ەسكە سالساق، قىستىگۇنى ول شىعىس قازاقستان وبلىسى پريرەچنوە اۋىلىنداعى قار توننەلدەرى تۋرالى ۆيدەو ورنالاستىرعان بولاتىن. شىعىس قازاقستان وبلىسى ۇلكەن تۋريستىك الەۋەتكە يە - ءوڭىردىڭ تابيعاتى وزىنشە ەرەكشە ءارى ءارالۋان - ءور التايدىڭ شىڭدارى، ەلدەگى ەڭ تۇنىق سۋى بار - مارقاكول، تانگە شيپا الاكول، تارباعاتاي مەن جوڭعار الاتاۋىنىڭ جوتالارى، قازاقستانداعى ەڭ ۇلكەن وزەن - ەرتىس، قاراعاي ورمانى.
ش ق و- دا شيپاجايلار مەن پانتىمەن ەمدەۋ ورىندارى وتە كوپ. بۇگىندە بەرەل، شىلىكتى قورعاندارى، «الەم كەرەمەتتەرى» قاتارىنا جاتقىزۋعا بولاتىن مۇزتاۋ (ونى «تيبەتتەگى قاسيەتتى ورىندارمەن» سالىستىرادى جانە كوپتەگەن ادامدار تاۋدىڭ تەك ش ق و جاعىنان عانا ءتاۋ ەتەدى) تۋرالى كوپتەگەن دەرەكتەر ءمالىم.
دەگەنمەن، «جەر كىندىگى» دەپ تە اتالاتىن بۇل ولكەنىڭ بەيمالىم تۇستارى جەتەرلىك. تاسكەسكەن - باقتى جولىنداعى قورعاننان ساق زامانىنداعى پاتشا قىزدىڭ مۇردەسى تابىلعانى بەلگىلى. عالىمدار وعان «ۇرجار حانشايىمى» دەگەن اتاۋ بەردى.
ول - ايگىلى ەسىك قورعانىنداعى التىن ادامنان كەيىنگى سوعان ۇقساس ەكىنشى ەسكەرتكىش. «ۇرجار حانشايىمى» ەسكەرتكىشى ءبىزدىڭ جىل ساناۋىمىزعا دەيىنگى IV- Ⅲ عاسىرلارعا تيەسىلى. ال سەمەي جەرىندە تانىمال ساياحاتشىلار دجوردج كەننان، پ. پ. سەمەنوۆ - تيان- شانسكي، پ. س. پاللاس جانە كورگەن- بىلگەندەرى جونىندە قىزىقتى ماعلۇماتتار قالدىرعان وزگە دە تۇلعالار بار. بۇل جەردە ساياسي جەر اۋدارىلعاندار، ءوڭىردى زەرتتەپ-بىلۋگە سۇبەلى ۇلەس قوسقان رەسەيدىڭ زيالى قاۋىم وكىلدەرى تۇردى، ولار - م. دوستويەۆسكي، ە. پ. ميحاەليس، ن. يا. كونشين، ن. ي. دولگوپولوۆ جانە كوپتەگەن باسقالارى. XX ع. باسىندا حالقىمىزدىڭ ازاماتتىق تاريحىنداعى ەڭ ۇلى ۇلتتىق يدەيا - الاش يدەياسى بولسا، ونىڭ العاشقى ىرگەتاسى - قازاق يدەولوگياسىنىڭ تەمىرقازىعى بولىپ، الاش قايراتكەرلەرى ءاليحان بوكەيحانوۆ، احمەت بايتۇرسىنوۆ، ءمىرجاقىپ دۋلاتوۆ، جۇسىپبەك ايماۋىتوۆتىڭ قولىمەن سەمەيدە قاعىلدى، بوستاندىق پەن تاۋەلسىزدىكتىڭ تۋى سەمەيدە تىگىلدى.
بۇگىندە شىعىس قازاقستان وبلىسىندا جولدار جوندەلىپ، تۋريستەرگە كورسەتىلەتىن قىزمەتتەردىڭ سەرۆيسىن جاقسىرتۋ جۇمىستارى قولعا الىنۋدا. وسى اپتادا وتكەن ۇكىمەت وتىرىسىندا پرەمەر-مينيستر باقىتجان ساعىنتايەۆ الاكولدىڭ جوعارى تۋريستىك الەۋەتىن اتاپ وتە كەلە، كول ءبىر ماۋسىمدا 2 ميلليون تۋريست قابىلداي الاتىنىن اتاپ وتكەن بولاتىن.
