ەسىم تورەنىڭ كەسەنەسى جاڭعىرتىلدى
توزىعى جەتكەن مازاردى جاڭارتۋعا مۇرىندىق بولعان بەلگىلى مەتسەنات - باۋىرجان وسپانوۆ. كەسەنەنى قالپىنا كەلتىرۋ مەتسەناتتىڭ كوپتەن بەرى ويلاپ جۇرگەن جوسپارىنىڭ ءبىرى بولعان. جۇزەگە اسۋىنا ەلباسىنىڭ «بولاشاققا باعدار: رۋحاني جاڭعىرۋ» ماقالاسى سەرپىن بەرگەن، دەپ حابارلايدى قازاقپارات ءتىلشىسى.
ەسىم تورە 19- عاسىردىڭ اياعى، 20 - عاسىردىڭ باسىندا ءومىر سۇرگەن. لەپسى وڭىرىندە داۋلەتتى بولىس، قايىرىمدى، جومارت ازامات رەتىندە ەل ەسىندە قالعان. «الاش وردا» قوزعالىسىن قارجىلاي قولداپ، قيىن- قىستاۋ زاماندا مۇقتاج جاندارعا مالىن تاراتىپ، حالىقتىڭ بوسىپ كەتپەۋىنە ۇلەس قوسقان.
«ەسىم تورە الىستان كەلگەن مۇقتاج جانداردىڭ وزدەرىنە ءبىر كۇننىڭ ىشىندە 700 جىلقىداي تاراتىپ بەرگەن. قانشا قيىن زامان بولسا دا وسى جەردە قالىپ، ءوز حالقىنا بولىسىپ، ءومىرى دە وسى جەردە ءوتتى. وسى جەردە قايتىس بولدى»، - دەيدى ەسىم تورەنىڭ ۇرپاعى تەمىربەك احمەتوۆ.
ەسىم تورەنىڭ جىلقىسىنىڭ كوپتىگى سونشالىق، سۋ ىشۋگە كەلگەندە شىنجىلى وزەنى بىرەر ساتكە اعىسىن توقتاتقان دەسەدى.
«ءبىز ارحيۆتەگى دۇنيەلەردى جيناپ جاتىرمىز. ەندى ارى قاراي كوپ كىتاپتار، دەرەكتى فيلمدەر شىعادى. سونىڭ ىشىندە ەسىم تورەنى، مۇحامەدجان تىنىشپايەۆ تۋرالى كوپتەگەن ەستەلىكتەر جايلى ەستيسىزدەر دەپ ويلايمىن»، - دەيدى مەتسەنات.
تۋعان جەر سالالىق باعدارلاماسى نەگىزىندە ەسىم تورە كەسەنەسىنەن بولەك الاشتىڭ 100 جىلدىعىنا وراي مۇحامەدجان تىنىشپايەۆتىڭ كىتابى جارىققا شىقپاق. لەپسى اۋىلىندا مەشىت، قابانباي اۋىلىندا سپورت كەشەنى سالىنىپ جاتىر.
اۆتور: سامال قابىشيەۆا
