باسپاناسىز قالعان جەتىمدەرگە اقتوبەلىك وتباسى پاتەر جالداپ بەردى

ولار جالدامالى پاتەرگە كوشىپ كەتتى، دەپ حابارلايدى قازاقپارات ءتىلشىسى. اقتوبە قالاسىندا تۇراتىن سارقۇلوۆتار اۋلەتىنىڭ ءتورت بالاسى اناسى كوز جۇمعان سوڭ ءبىر-ءبىرىن سۇيەپ، جەتىم ءوستى.

ال اكەسى مىرزاعالي سارقۇلوۆ باسقا ايەلگە كەتىپ قالعان بولاتىن. بۇعان دەيىن حابارلاعانىمىزداي، اعايىندى ءتورت جىگىتتىڭ اناسى گۇلميرا ساقتاعانوۆا ەكىنشى دەڭگەيلى بانكتەن 2,5 ميلليون تەڭگە نەسيە الىپ، 2007 -جىلدان بەرى نەسيە وتەلىپ كەلگەن.

الايدا 2015 -جىلى ايەل قايتىس بولعاننان كەيىن بالالارى بانك نەسيەسىن تولەيتىن اقشا تابا الماعان. قازىرگى كۇنى بەرەشەك 3,7 ميلليون تەڭگەگە جەتكەن. قارىزدى قايتارا الماعان ولار مۇراگەرلىكتەن باس تارتتى.

«ءبىز مۇراگەرلىكتەن باس تارتتىق. ءسويتىپ، ءۇيدى بوساتىپ بەردىك. اقتوبەلىك قانات- ءاليا ەسىمدى ەرلى- زايىپتى كەلىپ، بىزگە ءۇش بولمەلى پاتەردى جالداپ بەردى. ولار ەكى ايعا پاتەراقىنى تولەدى»، - دەيدى وتباسىنىڭ ۇلكەنى اباي جۇمابايەۆ.

ايتا كەتەيىك، قازىر بۇل وتباسىنىڭ بالالارى كەنجەسى مەرگەن سارقۇلوۆتى قورعانشىلىققا الۋ قۇجاتتارىن دا دايىنداپ جاتىر. مەكتەپ وقۋشىسى مەرگەن ونىڭ اعاسى، وتباسىلى الىشەر سارقۇلوۆتىڭ قامقورلىعىنا بەرىلۋى مۇمكىن.

«ءبىز وبلىس اكىمى بەردىبەك ساپاربايەۆقا ءۇمىت ارتىپ وتىرمىز. تاعى ءبىر رەت كەزدەسىپ، سويلەسۋدى جوسپارلاپ ءجۇرمىز»، - دەدى اباي جۇمابايەۆ.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى