قىرعىزستاندا قاتەرلى ىسىككە شالدىققان بالانى تۇيەنىڭ زارىمەن ەمدەگەن
بۇل تۋرالى Zanoza.kg حابارلايدى.
باقسى بالانى تۇيەنىڭ ءسۇتى جانە تۇيەنىڭ زارىمەن ەمدەگەن. ۇلتتىق ونكولوگيالىق ورتالىقتىڭ بالالار ءبولىمىنىڭ دارىگەر- ونكولوگى سۇلتان ستامبەكوۆتىڭ ايتۋىنشا، ءبىر جىل بۇرىن بەس ايلىق بالاعا قاتەرلى ىسىك دەگەن دياگنوز قويىلعان ەكەن.
ونىڭ سوزىنشە، ورتالىق قىز بالانى ءبىر جىل بويى ەمدەپ جاتقان. الايدا اكەسى كۇتپەگەن جەردە ءبۇلدىرشىندى الىپ كەتىپتى. ءبىر ايدان سوڭ قىزىمەن اۋرۋحاناعا قايتا كەلگەندە ول راكتىڭ ءتورتىنشى كەزەڭىندە بولعان.
«اتا-اناسى بۇگىن بالانى ۇزاق ۋاقىت كەشىكتىرىپ الىپ كەلدى. سويتسەك، ولار بالانى بالگەرگە الىپ بارعان ەكەن. ارينە، بۇل جاڭالىق ەمەس، ءبىراق ونىڭ ەمدەۋ ءتاسىلى تاڭعالدىردى، ول بالانى تۇيەنىڭ زارىمەن ەمدەپتى. سوندا نە ولار تۇيەگە سۋدى كوپ بەرىپ، سوسىن قاشان ءزار شىعارعانىن كۇتىپ تۇرا ما؟ ادامدار، ءبىز قايدا بارا جاتىرمىز؟»، - دەيدى نارازىلىق تانىتقان دارىگەر.
سۇلتان ستامبەكوۆتىڭ سوزىنشە، مەكەمەدە قاجەتتى ءدارى-دارمەك بار جانە ونىڭ ەم-دومى ءۇشىن ءتۇرلى قورلار مەن مەملەكەت تە كومەكتەسىپ جاتىر ەكەن.
«بۇل بالانىڭ تاعدىرى ءۇشىن ءبىر جىلدان بەرى كۇرەسىپ كەلەمىز. ول قاتەرلى ىسىككە قاراماستان ءبىر جىلدان بەرى امان- ەسەن. ايتپاقشى، الگى تۇيەنىڭ ءزارىنىڭ ليترىن 400 سومنان ساۋدالاعانىن دا ءبىلدىم. مۇمكىن، تۇيە اسىرايمىز»، - دەيدى دارىگەر.
قازىرگى تاڭدا قىزدىڭ جاعدايى تۇراقتى جانە ول ەم الۋدى جالعاستىرىپ جاتىر. دارىگەر، بالگەرگە كورىنگەن بالالاردىڭ اۋىر جاعدايدا اۋرۋحاناعا ءتۇسۋى ءبىرىنشى رەت كەزدەسىپ وتىرعان جوق دەيدى.
«مىناداي دا جاعداي بولعان، بالانىڭ مويىنىنداعى ىسىك ءۇشىن كۇرەسىپ، ءبىز ونى ەمدەي الدىق. ەندى ناتيجەگە جەتتىك دەگەن كەزدە اتا-اناسى ونى بالگەرگە الىپ كەتتى. وعان اپارۋعا تۋىستارى كەڭەس بەرگەن ەكەن. ال قايتا الىپ كەلگەن كەزدە، ءبارى كەش بولدى. ىسىك ۇلعايىپ كەتكەن. ناتيجەسىندە 7 جاسار بالا كوز جۇمدى»، - دەيدى ستامبەكوۆ.
