قازاقستاندا تيتاننان ءتىس يمپلانتتارى ءوندىرىلۋى مۇمكىن
ءبىرىڭعاي قازاقستان ستوماتولوگتارى قاۋىمداستىعىنىڭ پرەزيدەنتى (EKAS)، مەديتسينا عىلىمدارىنىڭ دوكتورى، IDA دۇنيەجۇزىلىك ستوماتولوگيا اكادەمياسىنىڭ اكادەميگى، ساۋلە ەسەمبايەۆا ءوز ۇيىمىنىڭ قازاقستاندا تيتان يمپلانتتارىن ءوندىرۋ ءىسىن جولعا قويۋدى جوسپارلاپ وتىرعانىن مالىمدەدى.
«بولاشاقتا تيتاندى قولدانۋ بويىنشا شىعىس قازاقستان وبلىسىمەن ىنتىماقتاستىقتى دامىتۋدى جوسپارلاپ وتىرمىز. ءبىراق، قازاقستاندا وندىرىلەتىن تيتاندار فيزيكالىق- حيميالىق قاسيەتتەرىنە بايلانىستى، دەنتالدى يمپلانتتاردى دايىنداۋعا جارامايدى. دەگەنمەن، ءقازىر تەحنولوگيالار وزگەردى جانە ەرتەڭ وزىندىك ءوندىرىستى دامىتۋ قاجەتتىگى تۋرالى بايانداما وقىلادى. ياعني، ءوز ەلىمىزدە تيتان يمپلانتتارىن ازىرلەۋدى جولعا قويۋ كەرەك»، - دەدى ول.
سونىمەن بىرگە، قاۋىمداستىق پرەزيدەنتى بۇل ءىستى بۇرىنىراقتا قولعا العاندارىن جانە ءبىرقاتار ساتسىزدىكتەردىڭ ورىن العانىن اتاپ ءوتتى.
«بۇل ءۇشىن ازىرگە تيتاننان ارتىق ماتەريال جوق. وسىدان 5 جىل بۇرىن بۇل تاقىرىپپەن تەرەڭىرەك اينالىسىپ كوردىك، ءبىراق بارلىق سىناقتارىمىز ءساتسىز شىعىپ، قولدان كەلەر قايران بولمادى. ءبىراق، سوڭعى ۋاقىتتا بۇل تاقىرىپ قايتادان جاندانىپ كەلەدى»، - دەدى ساۋلە ەسەمبايەۆا.
قازىرگى ۋاقىتتا قازاقستاندا ەكى ستوماتولوگيالىق قاۋىمداستىق بەلسەندى جۇمىس ىستەيدى: قازاقستان ستوماتولوگيالىق قاۋىمداستىعى جانە ءبىرىڭعاي قازاقستان ستوماتولوگتار قاۋىمداستىعى. ولاردىڭ نەگىزگى مىندەتتەرى پراكتيكالىق دارىگەرلەرگە قولدانىستاعى نورماتيۆتەردى ءتۇسىندىرۋ. ستوماتولوگيالىق قىزمەتتىڭ جۇمىسىن رەگلامەنتتەيتىن جاڭا بۇيرىقتاردىڭ، ستاندارتتاردىڭ جانە باسقا نورماتيۆتىك- قۇقىقتىق اكتىلەردىڭ جوبالارىن ازىرلەۋ دە قاۋىمداستىقتاردىڭ باسىم مىندەتتەرىنىڭ قاتارىندا.
اۆتور: ايجان سەرىكجان قىزى
