ەكسپو- دا تۇرىكمەنستان ۇلتتىق كۇنىن تويلاپ جاتىر
«تۇرىكمەنستاندا گازدان ەنەرگيا الۋ شارالارى كەڭىنەن دامىعان. بىزدە قۋاتتى گاز تۋربيناسى سالىندى. ەلەكتر جەلىلەرى تارتىلىپ جاتىر. سونىڭ ارقاسىندا ەنەرگيانى شەتەلگە ساتۋعا مۇمكىندىك بار. بۇگىن - تۇرىكمەنستاننىڭ ۇلتتىق كۇنى. وسىعان وراي، ءبىز بارلىق قازاقستاندىقتاردى ءوز پاۆيلونىمىزعا شاقىرامىز. ول جەردە تۇرىكمەن حالقىنىڭ بالامالى ەنەرگيا سالاسىنداعى جەتىستىكتەرىمەن تانىسۋعا بولادى»، - دەيدى تۇرىكمەنستاننىڭ ساۋدا- ەكونوميكالىق پالاتاسى ءتوراعاسىنىڭ ورىنباسارى داۋلەتكەلدى رەدجەپوۆ.
ونىڭ ايتۋىنشا، پاۆيلوندا ەكولوگيالىق ەلەكتر ستانسانىڭ جوباسىمەن تانىسۋعا مۇمكىندىك بار. اتالعان ستانسا تۇرىكمەنستاننىڭ وڭتۇستىگىندە سالىنىپ جاتىر.
«ال بالامالى ەنەرگيانى قاراقۇم شولىندە كوپتەپ وندىرۋگە بولادى. بۇدان بولەك، ءبىزدىڭ عالىمدارىمىز ەكولوگيالىق تازا فەرمانىڭ ۇلگىسىن ويلاپ تاپتى»، - دەپ اتاپ كورسەتتى رەدجەپوۆ. سونداي- اق تۇرىكمەنستاننىڭ پاۆيلونىندا گيندۋكۋش سۋ ەلەكتر ستانساسىنىڭ ماكەتى بار. اتالعان ستانسانىڭ جۇمىس ىستەپ جاتقانىنا 100 جىلدان استى، ءتىپتى ءبىراز قۇرال- جابدىقتارى سول كەزدەن بەرى ءالى تۇر. پاۆيلوننىڭ تاقىرىبى - «تابيعات- شەكسىز ەنەرگيانىڭ كوزى». بۇگىنگى سالتاناتتى شارا بارىسىندا تۇرىكمەنستاننىڭ ونەرپازدارى مەن ارتىستەرى ءوز ونەرلەرىن پاش ەتتى.
