استانانىڭ بارلىق مەكتەپتەرىنە ءبىرىڭعاي فورما ەنگىزىلدى
قالالىق ءبىلىم باسقارماسى فورمانىڭ ءتۇسى، ۇلگىسى مەن ماتاسىنىڭ ساپاسى كورسەتىلگەن نۇسقاۋلىقتى بارلىق مەكتەپتەرگە جولدادى، دەپ حابارلايدى قازاقپارات «ۆەچەرنيايا استانا» گازەتىنە سىلتەمە جاساپ.
جاڭا وقۋ جىلىنان باستاپ استاناداعى بارلىق مەكتەپ وقۋشىلارى قويۋ كوك ءتۇستى فورما كيەتىن بولادى. ءبىراق ولار بۇل كيىم ۇلگىسىنە بىرتىندەپ كوشىرىلەدى. «ءبىرىنشى سىنىپ وقۋشىلارى ءۇشىن قويۋ كوك ءتۇستى فورما ساتىپ الىنادى، - دەلىنگەن قۇجاتتا. - وزگە سىنىپ وقۋشىلارى ءۇشىن قويۋ كوك ءتۇستى مەكتەپ كيىمى قولدانىستاعى فورمالارى ەسكىرگەننەن كەيىن الىنادى. وسىلايشا، ءبىر ءتۇستى مەكتەپ فورماسىن كەزەڭ- كەزەڭىمەن ەنگىزۋ كوزدەلەدى».
ۇلدارعا ارنالعان مەكتەپ كيىمىنىڭ جيىنتىعىندا پيدجاك، جيلەت، شالبار، مەرەكەلىك اق كويلەك، كۇندەلىكتى كويلەك، توقىما كەۋدەشە، ۆودولازكا بار. ەرەجەگە ساي، ەڭ كەم دەگەندە كويلەك، جيلەت پەن شالبار بولۋى ءتيىس. قىزدارعا ارنالعان تولىق جيىنتىق كەلەسىدەي - پيدجاك، جيلەت، بەلدەمشە، كلاسسيكالىق بلۋزكا، توقىما كەۋدەشە، سارافان، ۆودولازكا. قۇجاتتا قىزداردىڭ گاردەروبىندا كەم دەگەندە قانداي كيىمدەر بولۋى تيىستىگى اتالماعان. مۇمكىن بۇل - بلۋزكا، جيلەت جانە بەلدەمشە.
مەكتەپ فورمالارىنا ايىرۋ بەلگىلەرى - وقىتۋ مەكەمەلەرىنىڭ ەمبلەمالارى ورنالاستىرىلاتىن بولادى. ولار پيدجاكقا جانە جيلەتكە تىگىلەدى. مەكتەپتەر ءبىرىڭعاي ۇلگى بويىنشا كيىمدەردى تىگىپ بەرەتىن مەكەمەنى وزدەرى تاڭدايدى.
ەڭ باستىسى - ساتىپ الىناتىن ونىمدەر قۇجاتتا كورسەتىلگەن تالاپتارعا ساي بولۋى ءتيىس.
اۆتور: ميرا تولەندى قىزى
