قىتايلىقتار ديماشتىڭ استاناداعى جەكە كەشىنە ارنايى ۇشىپ كەلىپ جاتىر
الەم بويىنشا 121 ەلدە ءوز ورتالىعى بار رەيتينگى جوعارى قىتايلىق تەلەارنا وكىلدەرى استانادا ءوتىپ جاتقان ەكسپو كورمەسى اياسىندا وڭتۇستىك قازاقستان وبلىسىندا ءىس ساپارمەن بولىپ قايتتى. ماقسات - كۇنگەي ءوڭىردىڭ تۇرمىس-تىرشىلىگىمەن تانىسۋ.
قىتايلىق ماماندار الداعى ۋاقىتتا وڭتۇستىك قازاقستان وبلىسى تۋرالى دەرەكتى فيلم ءتۇسىرۋدى دە جوسپارلاپ وتىر. تەك قانا وڭتۇستىك ءوڭىرى ەمەس، جالپى قازاقستاننىڭ مادەنيەتى مەن ەكونوميكالىق الەۋەتى، حالقى جايىندا رەپورتاجدار دايىنداپ، قازاق ەلىن الەمگە پاش ەتۋدى دە كوزدەۋدە.
بۇدان وزگە قىتايلىق قوناقتار ءوز سوزىندە تالانتىمەن الەمدى تامساندىرعان ديماش قۇدايبەرگەن تۋرالى دا ءسوز ەتتى.
«ديماشتىڭ قىتايداعى رەپۋتاتسياسى وتە جوعارى، كۇننەن كۇنگە ءوسىپ كەلە جاتىر. ءدال قازىر قولىمدا ناقتى ساندىق مالىمەت جوق. نەگىزى قىتايعا قازاقستاندى تانىتۋدا ديماشتىڭ اسەرى وتە مول بولدى. ديماش ەكى ەل مادەنيەتىنىڭ كوپىرىنە اينالدى.
ديماشتىڭ استانادا وتەتىن كەشىنە قىتايدان كوپتەگەن ونىڭ جانكۇيەرلەرى ۇشىپ كەلىپ، كونسەرتتى تاماشالاماقشى. بۇل كەش تە قازاقستان ءۇشىن ۇلكەن جارناما. شىنى كەرەك، ديماش دەسە - قازاقستاننىڭ، قازاقستان دەسە - ديماشتىڭ اتى اتالادى»، - دەدى CCTV ارناسىنىڭ باس پروديۋسەرى.
اقپارات رەتىندە ايتا كەتەيىك، بۇگىن استاناداعى «استانا ارەنا» ستاديونىندا قازاق ءانشىسى ديماش قۇدايبەرگەننىڭ جەكە كەشى وتەدى.
