ديماشتىڭ قىتايلىق فاناتتارى بۋرابايدا دەمالدى - فوتو
ەسكە سالا كەتسەك، بۇعان دەيىن ديماش قۇدايبەرگەننىڭ جەكە كونسەرتىن تاماشالاۋ ءۇشىن ءانشىنىڭ ءبىر توپ فاناتتارى استاناعا ۇشىپ كەلگەنىن ايتقان بولاتىنبىز. ولار وسى كۇندەرى «ەكسپو- 2017» حالىقارالىق كورمەسىن تاماشالاپ، بۋراباي دەمالىس ايماعىنا دا بارىپ ۇلگەرىپتى.
ديماشتىڭ جانكۇيەرلەرى قازاق جەرىنىڭ ەرەكشە اسەر قالدىرعانىن ايتادى. «ديماشتىڭ كونسەرتىن تاماشالاۋعا بەيجىڭنەن ارنايى كەلدىم. مۇمكىندىك بولسا، ديماشپەن سۋرەتكە ءتۇسىپ، قولتاڭباسىن العىم كەلەدى. قازاق ەلىن كورگەنىمە وتە قۋانىشتىمىن! استاناداعى «ەكسپو-2017» كورمەسى جوعارى دەڭگەيدە ۇيىمداستىرىلىپتى. سوسىن ءبىز بۋرابايدا بولدىق، تابيعاتى كەرەمەت! سوزبەن ايتىپ جەتكىزە المايمىن. تازا اۋا، ءمولدىر سۋ ءبارى-ءبارى ادامدى قاتتى باۋرايدى»، - دەيدى ديماشتىڭ فاناتى ليۋ چيان.
ەسكە سالايىق، «باستاۋ» كونسەرتى ەكسپو-2017 حالىقارالىق كورمەسى اياسىندا 27 -ماۋسىم كۇنى ەلورداداعى «استانا ارەنا» ستاديونىندا وتەدى. ديماش قۇدايبەرگەن كونسەرتكە قاتىساتىن انشىلەردى كوپشىلىككە جاريالاعان بولاتىن. ولار - قىتايدىڭ بەلگىلى ءانشىسى تەرري لين، ەۆروۆيدەنيە-2012 بايقاۋىنىڭ جەڭىمپازى لورين (شۆەتسيا)، ۇلى بريتانيا ءانشىسى سوفي ەليس بەكستور، كريستينا ورباكايتە (رەسەي) جانە قازاقستاننىڭ ەڭبەك سىڭىرگەن ءارتىسى، وپەرا ءانشىسى مايرا مۇحامەد قىزى.
