الەمدىك تۋريستىك ۇيىم قازاقستاندى تۋريزم ءۇشىن ەڭ تارتىمدى ەل ەتۋدىڭ جولدارىن اتادى
«تۋريزم - قازاقستاننىڭ بولاشاعى. قازاقستان ءۇشىن بۇل سالانىڭ الەۋەتى جوعارى. تۋريزمدى العا جىلجىتۋ ءۇشىن نە ىستەۋ كەرەك؟ وسى رەتتە ەسكەرۋدى قاجەت ەتەتىن ءۇش نەگىزگى پۋنكتى ۇسىنعىم كەلەدى»، - دەپ توقتالدى تالەب ريفاي.
ونىڭ پىكىرىنشە، بىرىنشىدەن، قازاقستانعا ساپارلاۋ جىلدام، ارزان ءارى جەڭىل بولۋى ءتيىس. ول ءۇشىن شەتەلدىكتەرگە قازاقستاندىق ۆيزانى الۋ شارالارىن جەڭىلدەتۋ كەرەك.
«بۇل تۇرعىدا ۆيزانى الىپ تاستاۋدى سۇراپ وتىرعانىمىز جوق، ءبىراق تا ۆيزاعا قول جەتكىزۋدى قاراپايىم ەتۋ كەرەك. ءبىز 100 پايىزعا ەلەكتروندى ۆيزا تۇجىرىمداماسىن قولدايمىز، ياعني ادامدار ونلاين رەجىمدە ۆيزاعا ءوتىنىم بەرە الادى. سەبەبى تۋريستەر ەلشىلىكتە نەمەسە كونسۋلدىقتا كەزەكتە تۇرۋدى، بىرنەشە كۇن بويى جاۋاپتى كۇتكەندى قالامايتىنى انىق. ۆيزاعا ەلەكتروندى نۇسقادا ءوتىنىم بەرۋ - ول قاۋىپسىزدەۋ ءارى قولايلى. بۇل ءوز كەزەگىندە ەلەكروندى بيلەت العانمەن بىردەي. سىزدەردى وسى ماسەلەنى زەرتتەۋگە شاقىرامىن. اتاپ ايتقاندا، ساياحاتتاۋدىڭ قاۋىپسىزدىگى مەن جەڭىلدىگى بىرنە- ءبىرى قايشى ەمەس، كەرىسىنشە سالانى وڭتايلاندىرۋعا جول اشادى»، - دەپ توقتالدى يۋنۆتو باس حاتشىسى.
بۇدان بولەك ول شەتەل اۋە رەيستەرى سانىن ارتتىرا وتىرىپ، ۇكىمەتكە اۋە كەڭىستىگىن بارىنشا اشۋعا كەڭەس بەردى.
«ارينە، ءبىر مەزەتتە بارلىق اۋە قاتىناستارىن اشۋ مۇمكىن ەمەس. وزدەرىڭىز ءۇشىن ەكى- ءۇش جىلدىق مەرزىمدى بەلگىلەپ، اۋە بايلانىستارىن اشىق ەتىڭىزدەر»، - دەپ ۇسىندى ت. ريفاي.
ونىڭ سوزىنە قاراعاندا، ەكىنشىدەن، الەم ەلدەرى قازاقستان جايىندا تولىق بىلە بەرمەيدى، سوندىقتان رەسپۋبليكا دۇنيەجۇزى بويىنشا وڭدى يميدجگە ينۆەستيتسيا سالۋدان تارتىنباۋى ءتيىس. بۇل رەتتە ترۋزيمدى العا جىلجىتۋ مەن ماركەتينگكە ينۆەستيتسيانى ۇنەمى باعىتتاپ وتىرۋ قاجەت.
«سىزدەر ينفراقۇرىلىمعا، اۋەجايلار مەن جولدارعا قىرۋار قارجى ينۆەستيتسيالادىڭىزدار. ەندى قازاقستاننىڭ يميدجىن نىعايتۋعا ينۆەستيتسيا سالۋ كەرەك»، - دەيدى ول.
يۋنۆتو باس حاتشىسىنىڭ پايىمىنشا، قازاقستان ستراتەگياسىندا ءۇشىنشى ەكپىندى قىزمەتكەرلەر قۇرامىن وقىتۋعا قويۋى ءتيىس. وسى ورايدا قاجەتتى كۋرستاردى قامتاماسىز ەتىپ، دۇرىس ءبىلىم بەرىپ، ءتيىستى ساياساتتى قالىپتاستىرۋ كەرەك.
«قازاقستان الەمدەگى ەڭ ۇزدىك تۋريستىك باعىت بولۋى ءۇشىن قولداۋ جاساۋعا ءازىرمىز. سوندىقتان قازاقستان حالىقارالىق تۋريزمنىڭ جۇلدىزى بولا المايدى دەۋگە ەش نەگىز جوق»، - دەپ قاداپ ايتتى تالەب ريفاي.
اۆتور: رۋسلان عابباسوۆ
