ديماش قۇدايبەرگەن: جىلقى جىلى بولعاننان كەيىن بە، توپتى كورسەم جارىپ شىققىم كەلىپ تۇرادى - كەسكىن

كەشتە حالىقارالىق  «I am a Singer» بايقاۋىنىڭ جەڭىمپازى ەكى كومپوزيتسيا ورىندادى، دەپ حابارلايدى قازاقپارات.

قازاقپارات تاراتقان ۆيدەودان اتالعان كونسەرتكە ديماشتىڭ قىتايلىق تىڭدارماندارىنىڭ دا كوپتەپ قاتىسقاندىعىن بايقاۋعا بولادى. ولار قىتاي تىلىندەگى پلاكاتتاردى كوتەرىپ، وزدەرىنىڭ انشىگە دەگەن قۇرمەتىن ءبىلدىردى.

قازاقستاندىق ءانشى ءوزىنىڭ قىتايلىق تىڭدارماندارىندا اعىلشىن تىلىندە العىس ايتتى.

ايتا كەتەيىك، قىتايلىق ءبىر توپ جانكۇيەر ديماش قۇدايبەرگەننىڭ جەكە كونسەرتىن تاماشالاۋ ءۇشىن استاناعا ۇشىپ كەلگەندىگى تۋرالى حابارلاعان بولاتىنمىز.

كورەرمەندەردىڭ ىستىق ىقىلاسىنا بولەنگەن ديماش ءبىرىنشى ءانىن ورىنداعاننان كەيىن تىڭدارماندارىنا زور ءىلتيپات ءبىلدىرىپ، جۇرەكجاردى ءسوزىن ايتتى. «وزىمە ساحناداعى مادەنيەتىمە كىشكەنە ەرىك بەرىپ جاتقانىما ايىپ ەتپەڭىزدەر. قازاقتا «جىلقى جىلى بولعاننان كەيىن بە، توپتى كورسەم جارىپ شىققىم كەلىپ تۇرادى» دەيتىن جاقسى ءسوز بار. سىزدەردىڭ ىقىلاستارىڭىزدى، داۋىستارىڭىزدى اسىعا كۇتتىم، اعايىن»، - دەدى ءانشى كونسەرت بارىسىندا. سونداي-اق ديماش اقتوبە وبلىسىنىڭ اكىمى بەردىبەك ساپاربايەۆقا دا ارنايى العىس ءبىلدىردى. «اعاسى باردىڭ جاعاسى بار، ءىنىسى باردىڭ تىنىسى بار» دەگەن. مەنىڭ عانا ەمەس كوپتەگەن ونەر مايتالماندارىنىڭ ەمىن-ەركىن سامعاۋىن ۇلكەن سەپتىگىن تيگىزىپ جۇرگەن بەردىبەك اعا، سىزگە، العىس ايتامىن»، - دەدى ديماش.

ەسكە سالايىق، ديماشتىڭ «باستاۋ» اتتى كونسەرتى ەكسپو-2017 حالىقارالىق كورمەسى اياسىندا 27 -ماۋسىم كۇنى ەلورداداعى «استانا ارەنا» ستاديونىندا وتەدى. ديماش قۇدايبەرگەن كونسەرتكە قاتىساتىن انشىلەردى كوپشىلىككە جاريالاعان بولاتىن. ولار - قىتايدىڭ بەلگىلى ءانشىسى تەرري لين، ەۆروۆيدەنيا-2012 بايقاۋىنىڭ جەڭىمپازى لورين (شۆەتسيا)،  ۇلى بريتانيا ءانشىسى سوفي ەليس بەكستور، كريستينا ورباكايتە (رەسەي) جانە قازاقستاننىڭ ەڭبەك سىڭىرگەن ءارتىسى، وپەرا ءانشىسى مايرا مۇحامەد قىزى.

اۆتور: گۇلسايا جاقان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى