اقمولا وبلىسىنىڭ اكىمى جۇمىس ىستەگەندى ۇناتاتىنىن ايتتى
دەپ حابارلايدى «قازاقپارات» ح ا ا ءتىلشىسى.
باسپاءسوز ءماسليحاتى كەزىندە ءوڭىردىڭ الەۋمەتتىك- ەكونوميكالىق دامۋى تۋرالى بايانداعان ايماق باسشىسى جۋرناليستەردىڭ قويعان ساۋالدارىنا دا جاۋاپ بەردى.
«سىزگە دەيىنگى وبلىس باسشىلارى ءارتۇرلى ماماندىقتاردىڭ يەسى بولدى. ولاردىڭ اراسىندا ەكونوميستەر، اۋىل شارۋاشىلىعىنىڭ ماماندارى، قۇرىلىسشىلار، ءتىپتى، كۇشتىك قۇرىلىمنىڭ وكىلدەرى دە قىزمەت ەتتى. ءسىز وبلىس اكىمى بولىپ تاعايىندالعان ءبىرىنشى ديپلوماتسىز. ەل پرەزيدەنتى نۇرسۇلتان نازاربايەۆتىڭ ءوزى ءسىزدى وبلىس اكتيۆىنە تانىستىرىپ، تاعايىنداعالى 100 كۇن ءوتتى. سول جولى ەلباسى ايماقتى دامىتۋعا بايلانىستى ءبىرقاتار ماسەلەلەردى قويدى. اقمولا وبلىسىنىڭ ودان ءارى دامۋىنا قاتىستى ءسىزدىڭ كوزقاراسىڭىزدى بىلگىم كەلەدى»، - دەگەن ساۋال قويدى جۋرناليست.
وعان جاۋپ رەتىندە اكىم. «ءيا، مەن شىنىندا دا مەنىڭ ماماندىعىم ديپلومات. كەشەگى كەڭەس زامانىندا مۇنداي ماماندىققا يە بولۋ وڭاي ەمەس ەدى. ءبىزدىڭ كۋرستاستار جىل ارالاتىپ كەزدەسۋ وتكىزەدى. ءبىر قىزىعى مۇنداي كەزدەسۋلەر ماسكەۋدە ەمەس، استانادا وتكىزىلىپ ءجۇر. مەن ماسكەۋدەن سولتۇستىك قازاقستان وبلىسى اكىمىنىڭ ورىنباسارى قىزمەتىنە كەلدىم. جەرگىلىكتى جەردەگى جۇمىسپەن سول كەزدە اينالىستىم. جالپى وزىمە ناقتى جۇمىس ىستەگەن ۇنايدى. مىسالى، ەل يگىلىگىنە جاراتىلاتىن جاقسى ءبىر عيمارات سالدىڭ ەكەن دەيىك، الگى ەڭبەگىڭ قانشا جىل حالىقتىڭ كادەسىنە جارايدى عوي»، دەدى.
سونىمەن قاتار، باسپا ءسوز ءماسليحاتىنا جينالعان جۋرناليستەر وبلىس اكىمىنە تۋريزمدى دامىتۋ، ەلدى مەكەندەردى كوركەيتىپ، اباتتاندىرۋ، كوگىلدىر وتىنمەن قامتاماسىز ەتۋ، تۇرعىن ءۇي- كوممۋنالدىق شارۋاشىلىعىنىڭ جۇمىسىن شيراتۋ، استانا- بۋراباي باعىتىنداعى كۇرە جولدىڭ بويىنداعى جولاۋشىلارعا قىزمەت كورسەتۋدى جاقسارتۋ، استانا قالاسى ماڭىندا دەمالىس ورىندارىن كوبىرەك ۇيىمداستىرۋ ءتارىزدى سان الۋان ساۋالدار قويدى.
وبلىس اكىمى بۇقارالىق اقپارات قۇرالدارى وكىلدەرىنىڭ كوكەيىندە جۇرگەن ساۋالدارعا بارىنشا اشىق ءارى جان- جاقتى جاۋاپ قاتتى. ءسوز سوڭىندا وبلىس باسشىسى ءوزىنىڭ تىلشىلەر قاۋىمىمەن تىلدەسۋگە قاشاندا دايىن ەكەندىگىن ايتا كەلىپ، ولاردى الداعى ءتول مەرەكەلەرىمەن قۇتتىقتادى.
اۆتور: اسلان وسپانوۆ
