دۇنيەجۇزى قازاقتارى حاليفا التايدىڭ ەڭبەكتەرىنە ارنالعان كونفەرەنسيادا باس قوستى

اتالمىش شارا دۇنيەجۇزى قازاقتارىنىڭ V قۇرىلتايى اياسىندا تۇركى الەمىنە كەڭىنەن تانىمال ءدىنتانۋشى-عالىم التاي حاليفا عاقىپ ۇلىنىڭ تۋعانىنا 100 جىل تولۋىنا وراي ۇيىمداستىرىلدى.

ماقساتى - «قۇران كارىمدى» قازاق تىلىنە اۋدارعان جانە ونىڭ باسىپ شىعارىلۋىنىڭ باسى- قاسىندا بولعان، ءدىنتانۋشى-عالىم، جازۋشى، اقىن، ەتنوگراف حاليفا التايدىڭ سانقىرلى عىلىمي، شىعارماشىلىق، قوعامدىق قىزمەتىن جان-جاقتى اشىپ كورسەتۋ.

القالى جيىندا ساياساتتانۋشى، حالىقارالىق جۋرناليست دوسان بايمولدا، تۇركيانىڭ ميمار سينان ۋنيۆەرسيتەتىنىڭ پروفەسسورى، تاريحشى ءابدۋاقاپ قارا، فيلولوگيا عىلىمدارىنىڭ دوكتورى، شىعىستانۋشى عالىم يسلام جەمەنەي سەكىلدى بەلگىلى عالىمدار مەن تاريحشىلار التاي حاليفا عاقىپ ۇلى تۋرالى تەرەڭ ءماندى، تانىمدىق باياندامالار وقىدى.

شاراعا الەمنىڭ ءار تۇكپىرىنەن دۇنيەجۇزى قازاقتارىنىڭ V قۇرىلتايىنا كەلگەن قوناقتار، التاي حاليفانىڭ بالالارى مەن نەمەرەلەرى قاتىستى. كونفەرەنتسيا سوڭىندا «قازاقستان عالىمدارىنىڭ بيبليوگرافياسى» سەرياسىندا قازاق، ورىس، تۇرىك، اعىلشىن تىلدەرىندە جانە توتە جازۋ الىپبيىمەن «التاي حاليفا عاقىپ ۇلى» اتتى كىتابىنىڭ تۇساۋى كەسىلدى.

ح. التاي اۋدارعان قۇران اراب گرافيكاسىمەن 1989-جىلى جارىق كوردى. ول وسى نۇسقانى 1991-جىلى دالەلحان جانالتايمەن بىرلەسىپ، «قۇران كارىم، قازاقشا ماعىنا جانە تۇسىنىگى» دەگەن اتپەن مول تيراجبەن ساۋد ارابياسىنىڭ باسپا ءسوز ۋازىرلىگى تاراپىنان كيريلل ارىپتەرىمەن شىعارتىپ، قازاق ەلىنە جەتكىزدى.

حاليفا التاي اۋدارىپ شىعارعان «قۇراننىڭ» بۇل نۇسقاسى قازاقستاننان سىرت: رەسەي، موڭعوليا، قىرعىزستان، وزبەكستاندا، ازەربايجان ەلدەرىندە تۇراتىن قازاقتاردىڭ ۇلكەن رۋحاني بايلىعىنا اينالدى. كىتاپ مەدينە قالاسىنداعى پاتشا فاھدتىڭ «قۇران كارىمدى» باسۋعا ارنالعان كومبيناتىندا باسىپ شىعارىلادى.

باقىتجول كاكەش

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى