قىمباتشىلىق: ساۋداگەرلەر كوكونىس باعاسىنىڭ نەلىكتەن ارزانداماي جاتقانىن ءتۇسىندىردى
قازىر كارتوپ 250، ورامجاپىراق 280، ءسابىز 200 تەڭگەگە جەتكەن. ەلورداعا جاقىن وڭىرلەر مۇنى استانالىقتار تاراپىنان كوبەيگەن سۇرانىسپەن بايلانىستىرسا، تەرىسكەيلىكتەر بۇل قۇبىلىسقا كوكتەمگى تاسقىن كىنالى دەپ وتىر، دەپ حابارلايدى ك ت ك ارناسى.
قاراعاندىدا كارتوپتىڭ كوتەرمە باعاسىنىڭ ءوزى 200 تەڭگەدەن باستالادى. ال سولتۇستىك وڭىرلەرگە جەتكىزىلەتىن كوكونىستەردىڭ ءبارى وسى بازاردان تاسىلادى. بۇل قايتا سوڭعى ەكى ءۇش كۇندە باعانىڭ ساباسىنا تۇسكەنى دەيدى ساۋداگەرلەر.
«العان باعا قىمبات بولسا قىمبات قويامىز. ارزان كەلسە، ارزان بولادى. مىسالى، ورىك از بولسا، بىردەن ورىكتىڭ باعاسى كوتەرىلەدى. بيىل عانا قىمبات بوپ تۇر. جىلدا ارزان بولاتىن. كىم بىلەدى ەندى؟ بىردەن استاناعا كەتىپ جاتقان شىعار»، - دەيدى ساۋداگەر رايحان تاعايەۆا.
ال ءسابىز مۇندا 170، قىزىناق 280، قيار 300 تەڭدەگەن جوعارى. كەرەكۋلىكتەر دە قىمباتشىلىقتىڭ زاردابىن تارتىپ وتىر. بۇعان دەيىن كارتوپتىڭ كەلىسى 90 تەڭگە بولسا، قازىر 250. اتىراۋلىقتار ءتىپتى مىسىر مەن ءازىربايجاننان كارتوپ الدىرىپ جەپ ءجۇر. افريكادان اكەلىنگەنى 220، ال كاسپيدىڭ ارعى جاعىنان جەتكەنى 180 تەڭگە. كەرىسىنشە وزىمىزدە وسكەن كاپۋستا مەن ءسابىزدىڭ قۇنى اسپانداپ تۇر. ورامجاپىراق - 300، ءسابىز -180 تەڭگە. قىمباتشىلىق قىزىلجاردى دا قىسىپ بارادى. مۇندا كارتوپ پەن ءسابىز افيركانىڭ بانانىنان دا الدەقايدا قىمبات.
«تۇراقتاندىرۋ قورىنداعى كوكونىس تاۋسىلدى. قازىر ماۋسىم ايى. بىلتىرعى ءونىمدى ۇزاق ساقتاۋعا بىزدە مۇمكىندىك جوق. سوندىقتان باعا وسىلاي قۇبىلىپ تۇر»، - دەيدى پەتروپاۆل قالالىق اكىمدىگىنىڭ ءبولىم باسشىسى ەۆگەنيا سالنيكوۆا.
قىزىلجاردىڭ قارا توپىراعىندا وسەتىن ونىمدەردىڭ مۇنشاما قىمباتتاۋىنا بيىلعى تاسقىن دا سەبەپ كورىنەدى. كوكتەمدە جەرتولەلەردى باسقان سۋ حالىقتى ازىقسىز قالدىرعان. ال قورىنان ايرىلعان قىزىلجارلىقتار بازارداعى باعاعا قاراماي جاتىر.
كوكونىستىڭ قىمباتتاۋىن ماماندار ۋاقىتشا قۇبىلىس دەيدى. قازىر وڭتۇستىك وڭىرلەردەن جەتكىزىلەتىن كوكسوك كولەمى كوبەيسە، سولتۇستىك سورەلەرىندەگى باعا دا بايىبىنا ءتۇسۋى ءتيىس. ءبىر ءتۇيىر كارتوپتى ءبىر بولكە نانىڭ باعاسىمەن ساتىپ الىپ جۇرگەن جۇرتقا ازىرشە شىداي تۇرۋدان باسقا امال جوق.
