مەملەكەت باسشىسى شەتەلدە جۇرگەن تالانتتى قازاقتاردى ەلگە شاقىردى
بۇگىن ەلورداداعى تاۋەلسىزدىك سارايىندا وتكەن دۇنيەجۇزى قازاقتارىنىڭ V قۇرىلتايىندا قازاقستان پرەزيدەنتى نۇرسۇلتان نازاربايەۆ وسىلاي دەدى، دەپ حابارلايدى قازاقپارات.
«كەز كەلگەن مەملەكەت كاسىبي جاڭاشىل ماماندارعا مۇقتاج. تاريحي وتانىما ەڭبەك سىڭىرەمىن، ونىڭ دامۋىنا ۇلەس قوسامىن دەگەن ءار تالانتتى قازاقتى ەلگە جەكە شاقىرامىن. مەن بىلەمىن، جەكە ءتىزىمى دە بار، شەتەلدە جەكە كەزدەسۋىم دە بار. كەزىندە جاعدايسىز كوشىپ كەتكەن. عالىم بولىپ، زەرتحانالاردا جۇمىس ىستەپ جۇرگەن ازاماتتارىمىز بار. مەنىڭشە، ولاردىڭ ەلگە كەلەتىن ىنتاسى بار»، - دەدى مەملەكەت باسشىسى.
ق ر پرەزيدەنتى سول ازاماتتاردى ەلگە شاقىرىپ، ەڭبەك ەتۋگە جاعداي جاساۋ قاجەتتىگىن باسا ايتتى.
«ۇكىمەت وسىنداي ازاماتتاردى ەلگە تارتىپ، ماماندىعىنا، مۇمكىندىگىنە قاراي جاعداي جاساۋدىڭ تەتىكتەرىن قاراستىرسىن. ءبىراق كەيدە شاقىرامىز، كەلەدى. اندا جۇرەدى، مىندا جۇرەدى، ەشقايدا قابىلدانباي قايتىپ كەتەدى. ەل باسقارىپ وتىرعان ازاماتتارعا، مينيسترلەرگە وسىنى (مۇنداي جاعدايعا جول بەرمەۋدى - رەد.) تاپسىرامىن»، - دەدى ەلباسى.
