ەلباسى شەتەلدىك قازاق بالالارى ءۇشىن ستيپەنديالىق باعدارلاما ەنگىزۋدى جۇكتەدى
«شەتتە جۇرگەن اعايىننىڭ ۇرپاعىنا كومەك جاساۋ، ءوسىپ كەلە جاتقان جاستارعا قولۇشىن بەرۋ قاجەت. ءبىز شەتەلدەگى قازاق باۋىرلارىمىزدىڭ بالالارىنا قازاقستاندا ءبىلىم الۋلارىنا بار جاعدايلارىن جاساۋمىز كەرەك. قازىر ولار گرانت ارقىلى ەلىمىزدىڭ جوعارى وقۋ ورىندارىندا وقي الادى، وزدەرىڭىز بىلەسىزدەر. ۇكىمەتكە قانداستارىمىزدىڭ جوعارى ءبىلىم الۋلارىن قولجەتىمدى ەتۋ ءۇشىن، ولارعا بولىنەتىن كۆوتانى ەكى ەسەگە كوبەيتۋدى تاپسىرامىن»، - دەدى ەلباسى.
مەملەكەت باسشىسى قازىر قازاقستاندا ءبىلىم مەن عىلىمعا وتە كوپ كوڭىل ءبولىنىپ جاتقانىن اتاپ ءوتتى. تاۋەلسىزدىك جىلدار ىشىندە 1500 مەكتەپ سالىندى. كوپتەگەن جوعارى وقۋ ورىندارى بوي كوتەردى.
«دۇنيەجۇزى ۋنيۆەرسيتەتتەرىمەن تەرەزەسى تەڭ ۋنيۆەرسيتەتتەر سالىندى. نازاربايەۆ ۋنيۆەرسيتەتى، قازاق-بريتان ۋنيۆەرسيتەتى، كيمەپ دەگەن، IT- تەحنولوگيالار سىندى ۋنيۆەرسيتەتتەر بار. ءبىراق ەستەرىڭىزدە بولسىن، ول ۋنيۆەرسيتەتتەرگە ءتۇسۋ وڭاي ەمەس. ەگەردە ءبىلىمى جەتپەيتىن بولسا، ول بالالارعا ءبىرشاما دايىندىق وقىتۋلاردان وتكىزۋىمىز كەرەك. سەبەبى قانشا وقۋعا العانمەنەن، يگەرە المايتىن بولعاننان كەيىن، وقۋدان شىعىپ كەتەدى، ونى ءبىز بىلەمىز. شەتەلدىك قازاق ستۋدەنتتەرى ءۇشىن ارنايى ستيپەنديالىق باعدارلاما ەنگىزۋ كەرەكتىگىن ايتىپ وتىرعانىم وسىدان. قاي ەلدىڭ ازاماتى بولسا دا، ەلدە وقىعان قازاق بالاسى ەرتەڭ، ارينە، قازاقستانعا قىزمەت ەتەدى»، - دەدى پرەزيدەنت قۇرىلتايدىڭ اشىلۋ سالتاناتىندا.
ايتا كەتەيىك، استانادا ەلباسىنىڭ قاتىسۋىمەن دۇنيەجۇزى قازاقتارىنىڭ V قۇرىلتايى وتۋدە.
