قازاقستان پرەزيدەنتى جاڭا الەمدەگى ب ا ق مىندەتتەرىن اتادى

بۇگىن ەلوردادا XIV ەۋرازيا مەديا فورۋمىنىڭ اشىلۋىنا وراي ەلباسى نۇرسۇلتان نازاربايەۆ قۇتتىقتاۋ سوزىندە وسىلاي ايتتى، دەپ حابارلايدى قازاقپارات.

ق ر پرەزيدەنتىنىڭ قۇتتىقتاۋ ءسوزىن فورۋمدا ق ر مەملەكەت حاتشىسى گۇلشارا ءابدىقالىقوۆا وقىپ بەردى.

«الەم درامالىق وزگەرىستەردى باسىنان وتكەرىپ جاتقان قازىرگى زامانعى جاعدايدا وسىنداي ديالوگ الاڭدارىنىڭ قاجەتتىلىگى ارتىپ كەلەدى. الەمدىك كونتەكستە باسقا كوزقاراستارعا قۇرمەتپەن قارايتىن تەك اشىق ديالوگ قانا ميلليونداعان ادامداردىڭ وزەكتى پروبلەمالارىن شەشۋ ءۇشىن جاھاندىق سەنىمدى قالپىنا كەلتىرۋ باعدارى بولادى. بۇقارالىق اقپارات قۇرالدارى وسى پروتسەستىڭ كوشباسشىسى بولۋى ءتيىس جانە ءوزىنىڭ كۇش-جىگەرىن جاڭا كەدەرگىلەردى قويۋعا ەمەس، كەرىسىنشە، حالىقتار مەن ەلدەردى بىرىكتىرۋگە شوعىرلاندىرۋى كەرەك. الەم جاڭا اقپاراتتىق ورتانى قالىپتاستىرۋ داۋىرىنە اياق باستى جانە وسى ورايدا سەرىكتەستىك پەن ءبىلىم الماسۋدى ىنتالاندىرۋى ءۇشىن قولىمىزدان كەلگەنشە ارەكەت ەتۋىمىز قاجەت»، - دەپ اتاپ وتىلگەن مەملەكەت باسشىسىنىڭ سوزىندە.

پرەزيدەنت 15 جىلدىڭ ىشىندە ەۋرازيا مەديا فورۋمى لايىقتى بەدەلگە يە بولعانىن جەتكىزدى. «سونىمەن قاتار الداعى الەۋمەتتىك جانە تەحنولوگيالىق وزگەرىستەرگە دايىندىق تۇراقتى دامۋدىڭ ايقىنداۋشى فاكتورى بولادى. وسىعان بايلانىستى فورۋمنىڭ كۇن تارتىبىنە تەحنولوگيالىق ءتارتىپتىڭ وزگەرۋىندە نەگىزگى باعىتى رەتىندە «جاسىل» ەكونوميكا ماسەلەلەرىنىڭ ەنگىزىلۋى سيمۆولدىق مانگە يە. بۇل ءوز كەزەگىندە، استانادا ءوتىپ جاتقان ەكسپو-2017 كورمەسىنىڭ تاقىرىبىنا ۇندەس»، - دەپ توقتالدى ن. نازاربايەۆ.

ايتا كەتەيىك، ە ا م ف 2002-جىلى داريعا نازاربايەۆانىڭ باستاماسىمەن بەيساياسي ءارى كوممەرتسيالىق ەمەس ۇيىم رەتىندە قۇرىلدى. فورۋم باتىس پەن شىعىستى تولعاندىراتىن كوكەيكەستى ماسەلەلەردى اشىق تالقىلاۋعا باعىتتالعان.

بيىلعى فورۋم ەكسپو-2017 اياسىندا ۇيىمداستىرىلىپ، كورمە اۋماعىنداعى جاڭا كونگرەسس-ورتالىقتا ءوتىپ جاتىر. ءىس-شارا جىل سايىن الەمنىڭ 60 تان استام مەملەكەتىنەن حالىقارالىق جانە قازاقستاندىق ب ا ق وكىلدەرىن، ساياساتكەرلەرىن، ساراپشىلاردى ءبىر الاڭعا جيناپ كەلەدى.

شارانىڭ كۇن تارتىبىندە «جاڭا الەمدىك ءتارتىپ: قابىرعا تۇرعىزامىز با الدە كوپىر سالامىز با؟»، «بولاشاقتىڭ ەنەرگياسى»: «جاسىل ەكونوميكانىڭ قۋاتى»، «ازيا «ەكونوميكالىق كەرەمەتىنىڭ» قۇپياسى»، «سيريا داعدارىسى: سوعىس ءورتى سونە مە؟»، «ساندىق ريەۆوليۋتسيا» تاقىرىپتارى تالقىلانادى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى