نۇرسۇلتان نازاربايەۆ شەتەلدىك ينۆەستورلار كەڭەسىنىڭ جاڭا مۇشەلەرىن تانىستىردى

«وسى ۋاقىت ارالىعىندا كەزدەسۋىمىز جاقسى داستۇرگە اينالدى جانە ءبىز بىرلەسىپ كوپ ءىس اتقاردىق. سىزدەر ءبىزدىڭ ەكونوميكامىزدىڭ قالىپتاسۋىنا زور كومەك كورسەتتىڭىزدەر، قازىرگى ۋاقىتتا قولعا العان رەفورمالارىمىزدى جۇرگىزدىڭىزدەر. ءبىزدىڭ كەزدەسۋىمىز ەكونوميكالىق دامۋ تۇرعىسىنداعى وزەكتى تاقىرىپتاردى تالقىلايتىن ماڭىزدى الاڭعا اينالدى. كەڭەس قۇرامىنا ەلىمىزدىڭ جۇمىس ىستەپ جاتقان ءىرى شەتەلدىك كومپانيالاردىڭ وكىلدەرى كىرەدى»، - دەپ اتاپ ءوتتى كەڭەس جۇمىسىن اشقان قازاقستان پرەزيدەنتى.

مەملەكەت باسشىسى كەڭەس قۇرامى جىلدان جىلعا ساپالىق تۇرعىدا جاڭارىپ وتىراتىندىعىن اتاپ ءوتتى. «كۇن تارتىبىنە كوشپەس بۇرىن مەن سىزدەرگە كەڭەستىڭ جاڭا مۇشەلەرىن تانىستىرعىم كەلەدى: ازيا دامۋ بانكىنىڭ جەكە سەكتورداعى وپەراتسيالار جانە تەڭ قارجىلاندىرۋ جونىندەگى ۆيتسە- پرەزيدەنتى ديۆاكارا گۋپتا، «مارۋبەني كورپورەيشن» كومپانياسىنىڭ ەۋروپا، افريكا، ت م د ەلدەرى بويىنشا اعا وڭىرلىك اتقارۋشى وفيتسەرى ناويا يۆاشيتا. ولار زەينەتكەرلىككە شىققان ارپتەستەرىنىڭ ورنىنا كەلىپ وتىر. كادرلىق وزگەرىستەرگە بايلانىستى كەڭەس قۇرامىنا قازاقستان تارابىنان جاڭا مۇشەلەر كىرىپ وتىر. مۇنان بولەك، وتىرىسقا بايقاۋشى كومپانيالار دا قاتىسۋدا»، - دەدى نۇرسۇلتان نازاربايەۆ.

ايتا كەتەيىك، شەتەلدىك ينۆەستورلار كەڭەسى قازاقستان پرەزيدەنتى جانىنداعى كەڭەسشى- كونسۋلتاتيۆتى ورگان بولىپ سانالادى. كەڭەس 1998 - جىلى ەلدەگى ينۆەستيتسيالىق قىزمەت پەن ينۆەستيتسيالىق احۋالدى جاقسارتۋمەن تىكەلەي بايلانىستى وزەكتى ماسەلەلەردى ءتيىمدى شەشۋ ءۇشىن مەملەكەت پەن شەتەلدىك ينۆەستورلار اراسىنداعى تىكەلەي ءۇنقاتىسۋدى قامتاماسىز ەتۋ ماقساتىندا قۇرىلعان. ەلدىڭ ينۆەستيتسيالىق ساياساتى مەن ەكونوميكالىق دامۋىنىڭ باستى اسپەكتىلەرى بويىنشا قازاقستان پرەزيدەنتى مەن ۇكىمەتىنىڭ قاراۋىنا ۇسىنىمدار مەن ۇسىنىستاردى ازىرلەۋ كەڭەستىڭ باستى مىندەتى سانالادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى