استانانىڭ قالىپتاسۋىندا ەلباسىنىڭ ەڭبەگى زور - نەسىپبەك ايت ۇلى
اۋەجايدان بولەك، تۇتاس ەلوردانىڭ استانا بولىپ قالىپتاسۋىنا نازاربايەۆتىڭ سىڭىرگەن ەڭبەگى وراسان زور. مۇنداي پىكىردى ق ر مەملەكەتتىك سىيلىعىنىڭ لاۋرەاتى، قوعام قايراتكەرى، اقىن نەسىپبەك ايت ۇلى ءبىلدىردى.
ءوز سوزىندە اقىن جيىرما جىل بۇرىن ەل استاناسىن سارى ارقا توسىنە كوشىرگەن ەلباسىنىڭ ەڭبەگىن ەرەكشە اتاپ ءوتتى.
«استانا اۋەجايىنا نۇرسۇلتان نازاربايەۆتىڭ ەسىمىن بەرگەنىن ەستىپ، قۋانىپ وتىرمىن. ەلباسىنىڭ بار ەڭبەگىن جيىپ قويىپ، ەل استاناسىن سارى ارقا توسىنە كوشىرگەنى ءۇشىن دە التىننان ەسكەرتكىش قويۋعا بولادى. سەبەبى، قيىن-قىستاۋ زاماندا ەل استاناسىن اۋىستىرۋ وڭاي شارۋا ەمەس. بۇل شەشىمنىڭ ناعىز كورەگەندىك ەكەنىنە ەندى كوزىمىز جەتىپ وتىر. جيىرما جىل بۇرىن جازىق دالادا جاڭا قالا بوي كوتەرەدى دەگەنگە ەشكىم سەنبەپ ەدى، ەندى مىنە سول استانادا ايداي الەم كوز تىگىپ وتىرعان حالىقارالىق ەكسپو-2017 كورمەسى ءوتىپ جاتىر»، - دەدى ول.
سونداي-اق، ن. ايت ۇلى الەمنىڭ وزىق مەملەكەتتەرىندە ەل باسقارعان ەرەن تۇلعالاردىڭ اتىمەن اتالاتىن اۋەجايلاردىڭ بار ەكەنىن ايتىپ، بۇگىنگى قاۋلىنىڭ ناعىز لايىقتى شەشىم ەكەنىن جەتكىزدى.
«كەزىندە پەتر 1 سولتۇستىكتەن جاڭا قالانىڭ ىرگەتاسىن قالاپ ەدى، سول پەتردەن مۇرا بولىپ قالعان اسەم سانكت-پەتەربۋرگ بۇگىندە تۇتاس رەسەيدىڭ ماقتانىشىنا اينالدى. ءبىر كەزدەرى استانانى نازاربايەۆتىڭ اتىمەن قايتا اتاۋدى ۇسىنعاندا دا قولداۋ بىلدىرگەنمىن. ول ۋاقىتتىڭ ەنشىسىندەگى ماسەلە. ال بۇگىنگى اۋەجايدى نازاربايەۆتىڭ اتىمەن اتاۋ - شىن مانىندە لايىقتى شەشىم»، - دەپ ءوز ءسوزىن تۇيىندەدى اقىن.
ايتا كەتەيىك، بۇگىن قازاقستان رەسپۋبليكاسى ۇكىمەتىنىڭ 2017-جىلعى 20- ماۋسىمداعى 381№ قاۋلىسىنا سايكەس استانا حالىقارالىق اۋەجايىنا ق ر پرەزيدەنتى نۇرسۇلتان نازاربايەۆتىڭ ەسىمى بەرىلدى.
سونىمەن بىرگە، مەملەكەت مەنشىگىندەگى وبەكتىلەرگە جەكە ادامداردىڭ ەسىمىن بەرۋ قاعيدالارىنا دا وزگەرىس ەنگىزىلدى.
اۆتور: ايجان سەرىكجان قىزى
