اۋەجايلاردا ەلدەن شىعۋعا سالىنعان شەكتەۋدى الىپ تاستايتىن تەرمينالدار ىسكە قوسىلدى

«بۇگىن استانا، الماتى، شىمكەنت، قاراعاندى جانە اقتاۋ قالالارىنىڭ اۋەجايلارىندا وندىرىستىك قارىزدار مەن ايىپپۇلداردى تاۋلىك بويى تولەۋگە ارنالعان تەرمينالدار ورناتىلدى. (...) الداعى ۋاقىتتا مۇنداي تەرمينالداردى رەسپۋبليكانىڭ بارلىق اۋەجايلارىنا ورناتۋ جوسپاردا بار»، - دەدى ق ر ادىلەت دەپارتامەنتى سوت اكتىلەرىن ورىنداۋ دەپارتامەنتىنىڭ ديرەكتورى ەرنار يبرايەۆ.

تولەۋ بارىسىندا ۇستالاتىن كوميسسيا %1 - ەڭ كەمى 100 تەڭگە. ناتيجەسىندە، ەل اۋماعىنان شىعۋعا شەكتەۋلەر 15 مينۋت ىشىندە اۆتوماتتى تۇردە الىنىپ تاستالادى.

ءبىراق، بورىشكەرلەر تىزىمىنە 2015-جىلدىڭ شىلدە ايىنان كەيىن ەنگەندەر عانا بۇل قىزمەتتى قولدانا الادى. سەبەبى، 2015-جىلدىڭ شىلدەسىنە دەيىنگى شەكتەۋلەر قاعاز جۇزىندە جاريالانعان جانە جۇيەگە ەنگىزىلمەگەن.

ە. يبرايەۆتىڭ ايتۋىنشا، تەرمينال ارقىلى اليمەنت، شىعىندى وتەۋ سەكىلدى مەرزىمدى تولەمدەردى تولەۋگە بولمايدى جانە 2 ميلليون تەڭگەدەن استام تولەمدەر قابىلدانبايدى. سەبەبى، ولار ق ر قارجى مينيسترلىگىنىڭ مونيتورينگىنە تيەسىلى.

«ءبىز قارجى مينيسترلىگىنە شەكتەۋلەردى الىپ تاستاۋ ءۇشىن ماسەلەنى مۇمكىندىگىنشە شەشۋ تۋرالى ءوتىنىش جازعانبىز»، - دەپ تولىقتىردى ول.

سونداي-اق، بۇل قۇرىلعى ارقىلى كوممۋنالدى تولەمدەر مەن سالىقتاردى، ۇيالى بايلانىس قىزمەتىنە تولەم جاساۋ مۇمكىندىگى قاراستىرىلۋدا. ازىرگە اپپارات استانا اۋەجايىنىڭ ەسكى تەرمينالىنا ورناتىلعان. حالىقارالىق اۋەجايدىڭ جاڭا تەرمينالى تەحنيكالىق تۇرعىدا دايىن بولعاندا، اپپارات سوندا اۋىستىرىلادى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى