وڭتۇستىكتىڭ ونەرپازدارى تۇركيالىقتاردى ءتانتى ەتتى - فوتو
اتالعان دەلەگاتتاردىڭ توپ جەتەكشىلەرىمەن وڭىرلىك كوممۋنيكاتسيالار قىزمەتىندە باسپا ءسوز كونفەرەنسياسى ۇيىمداستىرىلدى. باسپا ءسوز كونفەرەنسياسىنا قاتىسقان وبلىستىق مادەنيەت باسقارماسىنىڭ مادەنيەت جانە ونەر ءبولىمىنىڭ باسشىسى ع. شارافيەۆا، ش. قالداياقوۆ اتىنداعى وبلىستىق فيلارمونيا ءارتىسى س. ءابدىرايىموۆا، وبلىستىق وپەرا جانە بالەت تەاترىنىڭ ديرەكتورى ءا. نۇرماحانبەتوۆ باۋىرلاس ەل ىستىق ىقىلاسپەن قارسى العاندارىن ايتىپ، ءوز اسەرلەرىمەن ءبولىستى.
«قازاقستاننىڭ تۇركياداعى ەلشىلىگى كەچيورەن مۋنيتسيپاليتەتى مەن وڭتۇستىك قازاقستان وبلىسى اكىمدىگىنىڭ ۇيىمداستىرۋىمەن «بولاشاققا باعدار: رۋحاني جاڭعىرۋ» باعدارلاماسى جانە قازاقستان مەن تۇركيا اراسىنداعى ديپلوماتيالىق قارىم-قاتىناستاردىڭ 25 جىلدىعى اياسىندا ۇيىمداستىرىلعان قوس ەل اراسىنداعى مادەني بايلانىس انكارا، ادانا، مەرسين، ىستانبۇل قالالارىندا كەڭ كولەمدى كونسەرتتىك باعدارلامامەن ەرەكشەلەندى»، - دەدى ع. شارافيەۆا.
باۋىرلاس ەلدەر اراسىنداعى قارىم-قاتىناستى نىعايتۋ، ورتاق مادەنيەتتى قالىپتاستىرا وتىرىپ، ادەبي، رۋحاني قۇندىلىقتاردى دارىپتەۋ ماقساتىندا قولعا الىنعان ايتۋلى شارادا ونەر كورسەتكەن ەل ونەرپازدارىنا قازاقستاننىڭ تۇركياداعى ەلشىلىگى جانە اتالعان مەملەكەتتىڭ مادەنيەت باسشىلارى ايرىقشا قولداۋ ءبىلدىرىپ، العىستارىن جەتكىزدى.
«كۇنى بۇگىنگە دەيىن كۇنگەي ولكەنىڭ مادەنيەت مايشامىن مازداتىپ، داڭقتى ەلدىڭ دارا ونەرىن رەسپۋبليكالىق، حالىقارالىق ساحنا تورىندە تانىتقان ءاننىڭ دارابوزدارى، ءبيدىڭ تۇساۋ سالدىرماس تارلاندارى تۇركيالىق كورەرمەننىڭ شاتتىق شاپالاعىنا كومىلسە، قازاقتىڭ قارا دومبىراسىن كۇمبىرلەتىپ اتا ءانىن جاتىق نوتادا ورگەن ءداستۇرلى انشىلەر ەلدىڭ ۇلتتىق اۋەندەرىن اۋەلەتىپ، تاريحي مانگە تولى گاسترولدىك ساپاردا ايرىقشا ءىز قالدىردى. ونىڭ دالەلى، تۇركيا مەملەكەتىنىڭ اقپارات بەتتەرىندە ەلدىڭ سالەمىن ارقالاي بارعان وڭتۇستىك ونەرپازدارىنىڭ جارقىن بەينەلەرى كورىنىس تابۋى بولاتىن»، - دەپ اتاپ ءوتتى ءا. نۇرماحانبەتوۆ.
سونىمەن قاتار، «حالىقارالىق رامازان» فەستيۆالى اياسىندا تۇركيانىڭ باس قالاسى - انكارانىڭ كەچيورەن اۋدانىندا جىر الىبى جامبىل جابايەۆ اتىنداعى كوشەنىڭ سالتاناتتى اشىلۋ ءراسىمى دە جىلدىڭ ايرىقشا جاڭالىعى رەتىندە ورىن الدى.
بريفينگ بارىسىندا ش. قالداياقوۆ اتىنداعى وبلىستىق فيلارمونيا ءارتىسى س. ءابدىرايىموۆا ساپاردىڭ ءساتتى قادامدارى مەن «قازاقستان كەشى» كونسەرتى تۋرالى ايتتى. بريفينگ سوڭىندا سپيكەرلەر اپتالىق ساپار شەبەرلىكتى شىڭداۋ مەن مادەني قارىم-قاتىناستىڭ نىعايۋىنا ەرەكشە اسەر بەرەتىندىگىن ايتىپ، ەلباسى ماقالاسى اياسىندا جۇزەگە اسقان قوس ەل اراسىنداعى ەڭسەلى جوبا جالعاسىن تاباتىندىعىن جەتكىزدى.
