دەپۋتات: قازاقستاندا مەكتەپ وقۋلىقتارى قىمباتتاپ جاتىر

بۇل تۋرالى ءماجىلىستىڭ جالپى وتىرىسىندا ۇكىمەت باسشىسى باقىتجان ساعىنتايەۆتىڭ اتىنا جولداعان ساۋالىندا دەپۋتات يرينا سميرنوۆا ءمالىم ەتتى، دەپ حابارلايدى قازاقپارات.

«2016-جىلى وقۋ، انىقتامالىق، مەكتەپ ادەبيەتتەرى ساتىپ الۋشىعا شامامەن ءبىر داناسىنا 1000 تەڭگەنى قۇرادى. ءبىر جىلدىڭ ىشىندە وسى ادەبيەتتەر 20 پايىزعا، ال ورالدا 52 پايىزعا وسكەنى بايقالۋدا. جاڭا وقۋ جىلى مەكتەپ كىتاپتارى مەن وقۋ ادەبيەتتەرى قۇنى بويىنشا رەكورد ورناتۋى مۇمكىن»، - دەپ توقتالدى سميرنوۆا.

وسى ورايدا ول 2 سىنىپتىڭ كەيبىر وقۋلىقتارى باعاسىن مىسالعا كەلتىردى. «مۋزىكا» ءپانىنىڭ وقۋلىعى 1 مىڭ تەڭگە، «نوتا حرەستوماتياسى» -2 مىڭ، مۋزىكا بويىنشا جۇمىس داپتەرى 350 تەڭگە تۇرادى. جالپى وسى جيىنتىق 3350 تەڭگەگە تەڭ كەلىپ وتىر. «ورىس ءتىلى جانە ادەبيەتى» -3900 تەڭگەگە، جۇمىس داپتەرى -1000 تەڭگەگە باعالانىپ، جالپى 4900 تەڭگەنى قۇرادى. بۇدان بولەك، «ماتەماتيكا» - 3400 تەڭگە، جۇمىس داپتەرى - 1000 تەڭگەنى قامتىپ، جيناقتىق جالپى قۇنى 4400 تەڭگەگە جەتتى. دەپۋتاتتىڭ پايىمىنشا، باسپانىڭ پرايس- پاراقشاسىندا كورسەتىلگەن باعاعا قاراعاندا، بولشەك باعا جوعارى بولادى.

ءسوز سوڭىندا ول وقۋلىقتاردى باسىپ شىعارۋ مەن باعانى قالىپتاستىرۋ ۇدەرىسىن بارىنشا اشىق ءارى تۇسىنىكتى ەتۋ قاجەتتىگىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى