نيۋ- يوركتە وتكەن كينوفەستيۆالدا «اناعا اپارار جول» فيلمى ۇزدىك دەپ تانىلدى
«مەن ءبىزدىڭ «اناعا اپارار جول» فيلمىمىزدىڭ نيۋ- يوركتەگى ەۋرازيالىق كينو كينوفەستيۆالندە ۇزدىك كوركەم فيلم رەتىندە تانىلعاندىعىن قۋانا حابارلايمىن»، - دەپ ءبولىستى قۋانشىمەن رەجيسسەر اقان ساتايەۆ ءوزىنىڭ Instagram جەلىسىندەگى پاراقشاسىندا.
ونىڭ سوزىنشە، فەستيۆالدا فيلمنىڭ پروديۋسەرى ءاليا نازاربايەۆا «ەۋرازيا ايەلدەرى كينودا» ناگراداسىن العان، ال التىناي نوگەربەك ەڭ ۇزدىك اكتريسا اتاندى.
وسىعان دەيىن بىشكەكتە «اق ءىلبىس» VI ۇلتتىق سىيلىعىن تاپسىرۋ راسىمىندە «اناعا اپارار جول» فيلمى «ورتالىق ازياداعى ۇزدىك فيلم» اتانعان بولاتىن. وندا «اناعا اپارار جول» «ورتالىق ازيانىڭ ۇزدىك فيلمى»، «ورتالىق ازيانىڭ ۇزدىك اكتەرى» (ءادىل احمەتوۆ)، «ورتالىق ازيانىڭ ۇزدىك اكتريساسى» (التىناي نوگەربەك) اتتى ءۇش اتالىمعا ۇسىنىلعان ەدى.
بۇل فيلم سونىمەن قاتار 38- ماسكەۋ حالىقارالىق كينوفەستيۆالى مەن «ەۋرازيالىق كوپىر» حالىقارالىق كينوفەستيۆالندە كورسەتىلدى جانە اتالمىش بايقاۋلاردا التىناي نوگەربەك «ۇزدىك ايەل ءرولى» اتاعىن جەڭىپ الدى.
بۇعان قوسا، تاريحي دراما «سىنشىلار تاڭداۋى» كينوسىيلىعىنىڭ ءۇش اتاعىن جەڭىپ الدى. ولاردىڭ اراسىندا «ۇزدىك ايەل ءرولى» سىيلىعىنا التىناي نوگەربەك، «ەكىنشى پلانداعى ۇزدىك ايەل ءرولى» سىيلىعىنا ارۋجان جازىلبەكوۆا لايىقتى دەپ تابىلسا، «فيلمگە جازىلعان ۇزدىك مۋزىكا سىيلىعى» ءالىم زايروۆ پەن رومان ۆيشنيەۆسكيگە بۇيىردى.
ەسكە سالا كەتەيىك، «اناعا اپارار جول» فيلمىندە ءومىر جولىندا كوپتەگەن قيىندىقتاردى باستان وتكەرگەن ادامنىڭ تاعدىرى باياندالادى. ونىڭ ءومىر جولىندا كەزدەسكەن قيىندىقتاردىڭ بارلىعىن ەڭسەرۋىنە ءوزىنىڭ اناسىنا دەگەن ماحابباتى كومەكتەسەدى. باستى كەيىپكەردىڭ ءومىر جولى ارقىلى كارتينادا قازاق حالقىنىڭ تاعدىر تالايى كورىنىس تاپقان.
تۇسىرىلىمدەر ەلىمىزدە جانە ازەربايجان، بەلارۋس سياقتى مەملەكەتتەردە وتكەن. باستى رولدەردى التىناي نوگەربەك، ءادىل احمەتوۆ، ارۋجان جازىلبەكوۆ پەن ەركەبۇلان دايىروۆ سومدايدى.
