ارگەنتينادا گيتلەردىڭ جەكە ناتسيستىك زاتتارى جاسىرىلعان قۇپيا قويما تابىلدى - فوتو، كەسكىن

ساراپشىلار وندا ساقتالعان 75 زاتتىڭ بارلىعى بۇرىن ەكىنشى دۇنيەجۇزىلىك سوعىس كەزىندە گەرمانيانىڭ جوعارى شەندى ناتسيستەرىنە تيەسىلى بولعان دەگەن پىكىر بىلدىرەدى، دەپ حابارلايدى Reuters.

اتاپ ايتقاندا، جاسىرىن قويمادان ادولف گيتلەردىڭ ءمۇسىنى، انتيكۆاريات جانە جەكە قولدانۋ قۇرالدارى (سۆاستيكا بەينەلەنگەن براسلەتتەر، كرۋجكالار جانە فۋتليارلار مەن قانجارلار، باستى ولشەۋگە ارنالعان اسپاپ، ت. ب. ) تابىلعان.

سونىمەن قاتار، تابىلعان زاتتاردىڭ جوعارى شەندى ناتسيستەرگە تيەسىلى بولعانىن كۋالاندىراتىن فوتولار تابىلعان. اتاپ ايتقاندا، تابىلعان فوتولاردىڭ بىرىندە ادولف گيتلەردىڭ ءوزى قولىنا كوللەكتسيا ىشىنەن تابىلعان ۇلكەيتكىش شىنىنى ۇستاپ تۇرعان ءساتى بەينەلەنگەن.

«ءبىز تاريحشىلارعا حابارلاستىق، ولار بىزگە بۇل گيتلەردىڭ جەكە ءوزى قولدانعان ۇلكەيتكىش شىنىنىڭ ءتۇپنۇسقاسى ەكەنىن حابارلادى. ءبىز ەندى حالىقارالىق ساراپشىلارمەن جۇمىستى جالعاستىرۋدامىز»، - دەيدى ارگەنتينا فەدەرالدىق پوليتسياسىنىڭ باستىعى نەستور رونكاليا.

پوليتسيا ەندى بۇل ارتەفاكتىلەر ارگەنتيناعا قالاي كەلگەنىن انىقتاۋعا كىرىستى. الدىن الا بولجامدارعا سايكەس، ولاردى ءۇشىنشى رەيح قۇلاعاننان كەيىن ارگەنتينانى پانالاپ قاشىپ كەلگەن ناتسيستىك قىلمىسكەرلەر وزدەرىمەن بىرگە الىپ كەلۋى مۇمكىن.

قاۋىپسىزدىك ءمينيسترى پاتريتسيا بۋلريچ بارلىق ارتەفاكتىلەر جەرگىلىكتى مۋزەيگە تاپسىرىلاتىنىن مالىمدەدى.

ەستەرىڭىزگە سالا كەتەيىك، ەكىنشى دۇنيەجۇزىلىك سوعىستان كەيىن ناتسيستىك باسشىلار ارگەنتينادا بوي تاسالاعان. مۇندا «حولوكوستا ارحيتەكتورى» ادولف ەيحمانن ءومىر سۇرگەن، ونى كەيىن يزرايل بارلاۋشىلارى ۇستاپ اكەتىپ، بەيبىتشىلىك پەن ادامزاتتىڭ قاس جاۋى رەتىندە ءولىم جازاسىنا تارتىلعان بولاتىن. سونىمەن بىرگە، بۋەنوس- ايرەستە تۇتقىندارعا قارسى قاتىگەزدىككە تولى تاجىريبەلەرىمەن بەلگىلى بولعان دوكتور يوزەف مەنگەلە تۇرعان.

دەرەككوزى: شەتەلدىك ب ا ق

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى