ۇ ب ت: استانادا تۇلەكتەردىڭ قۋلىعى جاپپاي اشكەرە بولدى
بيىلعى ۇلتتىق ءبىرىڭعاي تەستىلەۋگە تۇلەكتەردىڭ ۇلكەن قوبالجۋمەن كەلگەنى انىق. ويتكەنى، سىناق جىلداعىداي ەمەس، كۇردەلەنە ءتۇسىپ، جاڭا فورماتتا باستالدى.
دەسە دە تاڭمەن تالاسا تۇرىپ، تەستىلەۋ ورتالىعىنا اعىلعان مەكتەپ بىتىرۋشىلەرۋدىڭ ءۇمىتى زور. باعىنىڭ دا، بابىنىڭ قاتار شاباتىنىنا ىشتەي سەنەدى. ۇل- قىزدارىنىڭ ۇكىلى ءۇمىتىن ۇكىلەپ كەلگەن اتا-انالار تاقىمدى ۇيدە قىسپاي، بالالارىمەن ەرە كەلگەن.
ال، تەست تاپسىراتىن اۋديتورياعا كىرگەندە ۇل-قىزدار ودان بەتەر مازاسىندانىپ كەتتى. ويتكەنى، تەكسەرۋ كەزىندە كوبىنىڭ قۋلىعى اشكەرە بولدى. ءبىرى ۇيالى تەلەفون جاسىرىپ وتپەك بولسا، ەندى بىرىنەن شپارگالكا تاركىلەندى. ءبىراق، بۇعان قاراماستان تۇلەكتەر جوعارى بال الاتىنىنا سەنىمدى.
«مەنىڭشە جەتكىلىكتى جاقسى بال الۋىم كەرەك. ءبىراق، ءوزىمدى سونداي اقىلدىمىن دەپ ويلامايمىن»، - دەيدى تۇلەك ءادىل سەيىتجانوۆ.
ال، ءارى-ءسارى كۇيگە تۇسكەن تۇلەكتەردى دەمەۋگە ءبىلىم ءمينيسترىنىڭ ءوزى كەلگەن. ەلىمىزدىڭ باس مۇعالىمى ەرلان ساعاديەۆ قۇپيا ساقتالعان تەست كىتاپشالارىن اشىپ بەرىپ، بارلىعىنا ساتتىلىك تىلەدى.
«سۇراقتار اسا قيىن ەمەس. ۋاقىت بار. ۋايىمعا سالىنۋدىڭ قاجەتى جوق»، - دەدى مينيستر.
جىلدا باسىنان داۋ ارىلمايتىن ۇ ب ت- نى بيىل تۇلەكتەردىڭ جاڭا فورماتتا تاپسىرىپ جاتقانى بەلگىلى. ياعني، سىناق ەكى كەزەڭگە بولىنگەن. وقۋشىلار الدىمەن اتتەستات الۋ ءۇشىن مەكتەپتە ەمتيحان تاپسىرىپ، ەندى مىنە جوعارعى وقۋ ورنىنا ءتۇسۋ ءۇشىن 140 سۇراققا جاۋاپ بەرۋى ءتيىس. ۋنيۆەرسيتەتكە ءتۇسۋ ءۇشىن كەمى 50 ۇپاي قاجەت.
«سۇراقتاردىڭ سانى كوبەيدى. ۋاقىت كوبەيدى. سۇراقتاردىڭ 20 پايىزى وزگەرگەن. بالالار وعان دايىن. ءار بالا 8-9 رەت سىناقتان ءوتتى»، - دەيدى ەرلان ساعاديەۆ.
ال، بالاسىنا ۋايىمداعان اتا- انالاردان مازا كەتكەن. كۇننىڭ ىستىعىنا قاراماي، سىناق ءوتىپ جاتقان اۋديتوريانى تىكەلەي ەفيردەن كورىپ تۇر. ال، 3 ساعات 50 مينۋت ۋاقىت بەرىلگەن تەستتەن العاشقى تۇلەك ەكى جارىم ساعاتتان كەيىن شىقتى.
ءبىر ايتا كەتەرلىگى سىناق ءوتىپ جاتقان كەزدە جەدەل- جاردەم عيماراتقا ءجيى-ءجيى كىردى. سويتسەك، قوبالجىعان تۇلەكتەر ەسىنەن تانىپ قالىپتى.
وسىلاي تۇلەكتەردىڭ جۇيكەسىن جۇقارتقان ۇ ب ت- نىڭ العاشقى كۇنى 17 مىڭ ۇل- قىز سىناق تاپسىردى. جالپى 1- شىلدەگە دەيىن جالعاساتىن تەستىلەۋدە ەل بويىنشا 93 مىڭ مەكتەپ ءبىتىرۋشى ەمتيحان تاپسىرماق. ال، ۇپايىنا كوڭىلى تولماعاندار ەرتەڭنەن باستاپ اپەللياتسيالىق شاعىم ءتۇسىرىپ نەمەسە تامىز ايىندا اقىلى تۇردە تەستتى قايتا تاپسىرا الادى. ونىڭ قۇنى 2.242 تەڭگە.
