استانادا كوشە ساۋداگەرلەرىنە ءبىرىڭعاي كيىم ۇلگىسى ەنگىزىلەدى
بۇل جايىندا كاسىپكەرلىك جانە ونەركاسىپ باسقارماسى مەن «استانا» الەۋمەتتىك-كاسىپكەرلىك كورپوراتسياسىنىڭ بىرلەسكەن باستاماسىمەن وتكەن ەسىل اۋداندىق اكىم اپپاراتىنىڭ جينالىسىندا ءمالىم بولدى.
«كوشە ساۋدالارىنىڭ 1000 ورنى» باعدارلاماسىنىڭ اياسىندا قىزمەتىن جۇرگىزىپ وتىرعان كاسىپكەرلەرگە ارنالعان ءبىرىڭعاي كيىم ۇلگىسى ماسەلەسىن شاعىن جانە ورتا كاسىپ يەلەرى دە تالقىلادى.
شاعىن جانە ورتا كاسىپ يەلەرى ۇسىنىلعان ۇلگىنىڭ قولايلىعىن ەسەپكە الا وتىرىپ ءبىرىڭعاي ۇلگىدەگى كيىمگە ۇلكەن قىزىعۋشىلىق تانىتتى. سونىمەن قاتار ءى ءى د جەرگىلىكتى پوليتسيا قىزمەتى ماماندارىنىڭ كوشەدەگى بەيبەرەكەت ساۋدا ماسەلەلەرى بويىنشا جەدەل-الدىن الۋ شارالارى كەزىندە اتالعان ساناتتاعى كاسىپكەرلەرگە قۇقىق قورعاۋ ورگاندارى تاراپىنان نارازىلىق بولمايدى.
كاسىپكەرلىك سالانى دامىتۋعا ارنالعان مەملەكەتتىك باعدارلاما اياسىندا قولداۋ تاپقان ءىرى تىگىن فابريكالارى بىرنەشە ۇلگىدەگى كيىم تۇرلەرىن ۇسىندى. كاسىپكەرلەردىڭ جالپى داۋىس بەرۋلەرى ارقىلى نىسانداردا كيىپ جۇرەتىن كيىمنىڭ ورتاق ۇلگىسى تاڭداپ الىندى.
بۇل ءىرى كاسىپورىندار مەن شاعىن جانە ورتا بيزنەس سۋبەكتىلەرى اراسىنداعى ءوزارا ىنتىماقتاستىقتىڭ كورىنىسى، دەپ سانايدى استانا ق. كاسىپكەرلىك جانە ونەركاسىپ باسقارماسىنىڭ ماماندارى.
ۆەدومستۆانىڭ ماماندارى نۇرجول ساياجولىنداعى ساتۋشىلارعا ارنالعان ءبىرىڭعاي ۇلگىدەگى كيىمدەردىڭ العاشقى كەزەڭىنەن كەيىن باسقا دا كوشە ساۋدالارىنىڭ وكىلدەرى اراسىندا دا كەڭ قولدانىسقا ەنگىزىلەتىنىنە سەنىمدى.
