نيۋ-يوركتەگى قازاق پوليتسەيى استانادا العاشقى جەكپە-جەگىن وتكىزەتىن بولدى

حالىقارالىق ەكسپو كورمەسى اياسىندا وتەتىن كەش وعان جاقسى مۇمكىندىك ۇسىنىپ وتىر.

بۇل تۋرالى «حابار 24» حابارلايدى.

بىرەۋ بىلسە، بىرەۋ بىلمەس، ءدال وسى ديماش نيازوۆ نيۋ-يوركتىڭ قازاق پوليتسياسى دەگەن اتپەن كەڭىنەن تانىمال. مۇحيتتىڭ ارعى جاعىندا تۇراتىن جەرلەسىمىز ديماش نيازوۆ كاسىپقوي رينگتە 11 كەزدەسۋ وتكىزىپ ۇلگەردى جانە بارلىعىندا جەڭىسكە جەتتى. اسىرەسە دەترويتتا بولعان جەكپە-جەك كوپشىلىكتىڭ ەسىندە ەرەكشە ساقتالىپ قالدى. ويتكەنى ول دومينيكاندىق قارسىلاسىن 5-راۋندتا جويقىن سوققىسىمەن نوكاۋتقا جىبەردى.

«بوكسپەن ەڭ العاش قازاقستاندا اينالىسا باستادىم. باپكەرىم نۇرعالي سافيۋللين بولاتىن. قازىر ول وليمپيادالىق قۇرامانى دايىندايدى. مىنە، سول ىرگەتاستىڭ ارقاسىندا بوكس الەمىنە جاقسىلاپ سىڭىسە الدىم. قازىرگى جەڭىستەرىمنىڭ بارلىعىن قازاقستاندىق مەكتەپپەن جانە قاندا بار قاسيەتىمىزبەن بايلانىستىرامىن»، - دەيدى ديماش نيازوۆ.

ديماش ا ق ش- تا جۇرگەنىمەن، تۋعان جەرىمەن بايلانىستى ەشقاشان ۇزگەن ەمەس. ۇنەمى ەلدە قالعان تۋىستارى جانە دوستارىمەن حابارلاسىپ تۇرادى. ال بوكس كەشىنە قاتىسۋ مۇمكىندىگى اشىلعاندا قۋانىشىندا شەك بولماپتى.

«استاناداعى كەزدەسۋ قىركۇيەك ايىندا وتەدى. قانات يسلامنىڭ كەزدەسۋى اياسىندا مەن دە ونەر كورسەتەتىن بولدىم. وتە قۋانىشتىمىن. قازىر ەلوردا قاتتى وزگەرگەن. حالىقارالىق ەكسپو كورمەسى ءوتىپ جاتىر. مىنە، وسىنىڭ اياسىندا مەن دە قارسىلاسىمدى جەڭىپ، حالقىما ەرەكشە اسەر سىيلاعىم كەلەدى»، - دەيدى ول.

ايتا كەتەيىك، ديماش نيازوۆ نيۋ-يوركتە ءتارتىپ ساقشىسى قىزمەتىن اتقارادى جانە جاي عانا پوليتسەي ەمەس، بەيبىت زاماننىڭ باتىرى. بىرنەشە رەت قاۋىپتى قىلمىسكەرلەردىڭ جولىن كەسىپ، ارنايى ماراپات الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى