قازاق ءتىلدى بۇلدىرشىندەردى شاحمات ويناۋعا ۇيرەتەتىن كىتاپ شىقتى
«ەڭ اقىلدى بالالارعا ارنالعان شاحمات جازبالارىن» شاحماتتان الەمنىڭ 12-چەمپيونى، رەسەيلىك الەكساندرا كوستەنيۋك جازىپ شىقتى، دەپ حابارلايدى قازاقپارات ءتىلشىسى.
96 بەتتەن تۇراتىن جۇمىس داپتەرى مەكتەپ جاسىنا دەيىنگى بالالارعا جانە باستاۋىش سىنىپ وقۋشىلارىنا ارنالعان.
جاس وقىرمان كىتاپتاعى ەرتەگى كەيىپكەرلەرىنىڭ كومەگىمەن سيقىرلى شاحمات الەمىمەن تانىسىپ، ويىننىڭ ەرەجەلەرىن يگەرۋگە جانە لوگيكا مەن زياتكەرلىك قابىلەتىن دامىتۋعا مۇمكىندىك الادى. ارنايى ىرىكتەلگەن جاتتىعۋلاردى ورىنداي الادى.
«الەكساندرا كوستەنيۋك كىتاپتى مەملەكەتتىك تىلدە شىعارۋعا بارلىق قۇقىقتاردى ءبىزدىڭ قورعا قۇرمەتپەن ۇسىندى. سونداي-اق باسىلىمنىڭ يدەياسىنا قازاقستاندىق شاحمات فەدەراتسياسى دا قولداۋ كورسەتتى. تارالىم رەسەيلىك شاحمات جازۋلارى باسىلعان تاپ سول تيپوگرافيادا شىعارىلدى. ءبىز كىتاپتىڭ اۋدارماسىن جاسادىق، الماتىداعى كىتاپ دۇكەندەرىمەن كەلىسىمشارت جاسالدى. ەندى كىتاپتاردى استانا قالاسىنا جەتكىزۋ ماسەلەلەرىن شەشىپ جاتىرمىز»، - دەپ حابارلادى ش. ەسەنوۆ اتىنداعى عىلىمي ءبىلىم بەرۋ قورىنىڭ اتقارۋشى ديرەكتورى ايعانىم مالىشەۆا.
مامانداردىڭ ايتۋىنشا، قازاقستاندا مەملەكەتتىك تىلدە شاحماتتى وقىتاتىن ادەبيەت مۇلدەم جوق. «جازۋلار تولىعىمەن قازاقستاندىق اۋديتورياعا بەيىمدەلگەن. بۇل جاي عانا اۋدارما، ورىس باسىلىمنان تۇسىرىلگەن كوشىرمە ەمەس. ءبىز ديزايندى قايتا جاسادىق. سيقىرلى پەريزات - الەكساندرامەن بىرگە بالالاردى سيقىرلى شاحمات پاتشالىعىنا ارمان مەن ارۋجان ەسىمدى كەيىپكەرلەر جەتەلەيتىن بولادى. قازاقستاندا شاحمات ويىنىن ۇيرەتەتىن ادەبيەت مۇلدە جوق. ءبىز قوعامدىق پىكىردى زەرتتەي وتىرىپ، مۇنداي كىتاپتار سۇرانىسقا يە بولاتىنىنا كوز جەتكىزىپ، جوبانى ىسكە اسىردىق»، - دەدى باسىلىمدى اۋدارعان قوردىڭ باعدارلامالار ۇيلەستىرۋشىسى جادىرا سارمانوۆا قازىر اتالعان كىتاپ الماتىداعى «كنيجنىي گورود»، «الماتى كىتاپ»، «اكادەمكنيگا» جەلىلەرىنىڭ دۇكەندەرىنە ساتىلىمعا ءتۇستى.
ەكى اپتادان سوڭ كىتاپ استاناداعى دۇكەندەرگە دە تۇسەتىن بولادى.
