مەديتسيناعا بولىنەتىن بيۋدجەت قاراجاتى جاۋاپسىز جۇمسالادى - مينيستر ءبىرتانوۆ

 ءمينيستردىڭ سوزىنە قاراعاندا، بۇگىنگى تاڭدا دەنساۋلىق ساقتاۋ سالاسىنىڭ ينفراقۇرىلىمىن دامىتۋدىڭ ءبىرىڭعاي جوسپارى دايىندالىپ جاتىر. «قازاقستاندا 7914 دەنساۋلىق ساقتاۋ مەكەمەسى بار. سونىڭ ىشىندە 85,5 پروتسەنت - مەملەكەتتىك ەمحانالار بولسا، 14,5 پروتسەنتى جەكە مەنشىككە تيەسىلى. مەديتسينالىق ۇيىمداردىڭ تەڭ جارتىسى 30 جىل بۇرىن سالىنعان. وتكەن جىلى 11 مىڭعا جۋىق ادام اۋرۋحاناعا جاتقىزۋدى 90 كۇننەن استام ۋاقىت كۇتكەن. الايدا رەسپۋبليكا بويىنشا 4,2 مىڭ جاتىن ورىن بوس تۇردى. وسىنىڭ ءوزى دۇرىس جوسپار قۇرماۋدىڭ دالەلى»، - دەدى ە. ءبىرتانوۆ ۇكىمەتتىڭ بۇگىنگى وتىرىسىندا.

ونىڭ پايىمىنشا، قازىرگى كەزدە جەرگىلىكتى اتقارۋشى ورگاندارى مەديتسينا سالاسىن دامىتۋعا 1 تريلليون تەڭگەنى سۇراپ وتىر. دەگەنمەن، قۇرىلىس نىساندارىن جوسپارلاۋ كەزىندە ولاردىڭ بيۋدجەت اقشاسىن كوپتەپ الۋعا دەگەن قۇلشىنىسى دا جوق ەمەس. ماسەلەن، استانادا بالالارعا ارنالعان ينفەكتسيالىق ەمحانادا ءبىر جاتىن ورىنعا 240 شارشى مەتر قاراستىرىلعان. ونداي كورسەتكىش حالىقارالىق تالاپتاردان ەكى ەسە ارتىق، ال رەسپۋبليكا بويىنشا سالىناتىن نىسانداردىڭ كورسەتكىشىنەن التى ەسە جوعارى بولىپ تۇر. وسىلايشا، ءبىر جاتىن ورىنعا بيۋدجەتتىڭ ءبىراز اقشاسى كەتىپ جاتادى.

«امبۋلاتورلىق مەكەمەنى سالۋ كەزىندە ناقتى قاجەتتىلىك، ياعني جەرگىلىكتى حالىقتىڭ سانى ەسكەرىلمەيدى. وسىنىڭ سالدارىنان جاتىن ورىندار بوس تۇرادى. جەرگىلىكتى اتقارۋشى ورگاندار بيۋدجەت قاراجاتىن ءتيىمدى جۇمساۋعا جاۋاپسىز قارايدى. سوندىقتان بىزگە دەنساۋلىق ساقتاۋدىڭ ينفراقۇرىلىمىن دامىتۋدىڭ ءبىرىڭعاي جوسپارى اسا قاجەت»، - دەپ اتاپ ءوتتى مينيستر.

 اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى