يتاليا حيرۋرگى رەسەيلىككە باس اۋىستىرۋ وپەراتسياسىن جاساۋدان باس تارتتى
بۇل تۋرالى "روسسيا-24" تەلەارناسىنىڭ سيۋجەتىندە ايتىلادى.
ەسكە سالا كەتەيىك، سەردجيو كاناۆەرو وسىعان دەيىن العاشقى وتانى رەسەيلىك باعدارلاماشى ۆالەري سپيريدونوۆقا جاساۋعا ۋادە بەرگەن ەدى. ءبىراق قازىرگى ۋاقىتتا دارىگەردىڭ جوسپارلارى وزگەرىپ، بۇل شەشىمىمەن باس تارتىپ وتىر.
باسىلىمنىڭ مالىمەتىنشە، دارىگەر وتانى رەسەيلىككە ەمەس، قىتاي ازاماتىنا جاسايتىن بولدى. سەبەبى دونور مەن رەتسيپيەنت ءبىر ءناسىلدى بولۋى ءتيىس ەكەن. "بىزگە جەرگىلىكتى تۇرعىنداردىڭ ىشىنەن دونور ىزدەۋ كەرەك. ءبىز اق ءناسىلدى ۆالەري سپيريدونوۆقا دونور بولا المايمىز. قىتاي ازاماتىنىڭ ەسىمىن ءالى ايتا المايمىز. تاڭداپ جاتىرمىز"، - دەدى نەيروحيرۋرگ. ايتا كەتەيىك، قىتايدا ادامنىڭ باسىن الماستىرۋ وپەراتسياسى مەملەكەتتىك دەڭگەيدە قارجىلاندىرىلادى. ول ءۇشىن ءتىپتى جەكە كلينيكا ءبولىپ بەرەدى. يتاليا حيرۋرگىنە ونداعان جەرگىلىكتى دارىگەر كومەكتەسەدى. "قىتايلىقتاردىڭ بۇل وتاعا كەلىسۋىنىڭ سەبەبى - ولار نوبەل سىيلىعىن جەڭىپ، قىتايدى عىلىمي دامۋدىڭ كۇشى ەتىپ كورسەتپەكشى"، - دەيدى حيرۋرگ كاناۆەرو.
وتا شامامەن 36 ساعات جاسالادى. وعان 15 ميلليون دوللارداي قاراجات كەرەك ەكەن. ناۋقاستىڭ باسىن قاتىرىپ بولعان سوڭ ونى دەنەدەن ءبولىپ الىپ، ارنايى بيولوگيالىق جەلىممەن دونوردىڭ دەنەسىنە جابىستىرادى. ال جۇلىن جاققا دارىگەرلەر پوليەتيلەنگليكول سالادى. ونىڭ كومەگىمەن نەيرونداردى بايلانىستىرادى. يتاليا حيرۋرگى وتانى 90 پايىزعا ءساتتى وتەدى دەگەن سەنىمدە. سونداي-اق، ول مۇنى ترانسپلانتولوگيا سالاسىندا جاڭالىق بولاتىنىن ايتىپ ءوتتى. دارىگەردىڭ ايتۋىنشا، باستى اۋىستىرۋ وپەراتسياسى ەڭ الدىمەن پاتسيەنتتىڭ دەنەسى مەن دونوردىڭ جاسۋشالارى وتتەگىسىز اعزادا ءومىر سۇرە العانشا سۋىتۋدان باستالادى.
سودان كەيىن ءىرى قانتامىرلارى مەن جۇلىن بولەك الىنادى. دونور مەن ناۋقاس جۇلىندارىنىڭ ۇشى ارنايى زاتپەن جابىستىرىلادى. وسىدان كەيىن ادام قوزعالماۋى ءۇشىن ءتورت اپتا بويى جاساندى كوماعا جاتقىزىلادى، بۇل كۇرەتامىرلار مەن بۇلشىق ەتتەردىڭ جازىلۋى ءۇشىن قاجەت. كاناۆەرونىڭ ايتۋىنشا، ادام ويانعاننان كەيىن ءوزىنىڭ ءتۇرىن سەزىنىپ، ءبىر جىلدىڭ ىشىندە قايتادان ءجۇرىپ ۇيرەنەدى. باسىلىمنىڭ مالىمەتىنشە، 2017 -جىلدىڭ كۇزىندە كلينيكالىق ءولىم جاعدايىندا بىرنەشە ناۋقاسقا وسىنداي وتا جاساۋ جوسپارلانىپ وتىر.
