قارجى ءمينيسترى قاراجاتتى ناقتى ەكونوميكاعا تەز جەتكىزۋدىڭ جولدارىن اتادى
بۇل تۋرالى ق ر پارلامەنتى پالاتالارىنىڭ بىرلەسكەن وتىرىسىندا قارجى ءمينيسترى باقىت سۇلتانوۆ اتاپ ءوتتى، دەپ حابارلايدى قازاقپارات.
«شىعىستار جاعىنان كوتەرىلگەن ماسەلەلەرگە توقتالساق، شىعىستار 98,3 پايىزعا اتقارىلىپ، 1 تريلليون 338 ميلليارد تەڭگەگە وسۋىمەن يگەرىلدى. بۇكىل شىعىستاردىڭ جارتىسىنان استامى، ياعني 4 تريلليون تەڭگە الەۋمەتتىك سالاعا باعىتتالدى. 4 ميلليون 980 مىڭ ادامعا بيۋدجەتتەن زەينەتاقى مەن جاردەماقى تولەندى. بيۋدجەت قاراجاتىنىڭ يگەرىلۋىن قاداعالاۋدا جاڭا تەتىك، ياعني كامەرالدىق باقىلاۋ ەنگىزىلدى. وتكەن جىلى مەملەكەتتىك ساتىپ الۋدا 13,7 ميلليارد تەڭگەگە بۇزۋشىلىقتار انىقتالدى. ونى تەكسەرۋ نىساندارى دەر كەزىندە وزدەرى تۇزەتتى. بۇزۋشىلىقتاردى تومەندەتۋ ءۇشىن بيۋدجەتتىڭ اتقارىلۋى كەزىندە پريەۆەنتيۆتىك شارالاردى قولدانۋدى كۇشەيتەمىز. بيۋدجەت قاراجاتىنىڭ تيىمدىلىگىن ارتتىرۋ، يگەرىلمەۋ مەن بۇزۋشىلىقتاردىڭ سوماسىن ازايتۋ - بيۋدجەت زاڭناماسىن جەتىلدىرۋ جۇمىسىنىڭ باستى ماقساتتارى»، - دەدى قارجى ءمينيسترى.
ونىڭ سوزىنە قاراعاندا، بيۋدجەت زاڭناماسىنا ءتيىستى باعىتتار بويىنشا وزگەرىستەر ەنگىزىلەدى. بىرىنشىدەن، بيۋدجەت پروتسەسىندەگى اكىمشىلىك كەدەرگىلەردى ازايتۋ. بۇل باعىتتا مەملەكەتتىك ورگانداردىڭ بيۋدجەت قاراجاتىن يگەرۋدە بيۋدجەتتىك باعدارلامانىڭ شەڭبەرىندە قاراجاتتى قايتا ءبولۋ دەربەستىكتەرى كەڭەيەدى. وسى ورايدا اكىمشىلەر مەن جەرگىلىكتى اتقارۋشى ورگانداردىڭ جاۋاپكەرشىلىگى دە كۇشەيتىلەتىن بولادى.
ەكىنشىدەن، مەملەكەتتىك ورگان بيۋدجەت قاراجاتىن يگەرە المايتىن جاعدايدا ول باسقا اكىمشىلىككە ۇكىمەت شەشىمىمەن قايتا بولىنەدى.
«ۇشىنشىدەن، كۆازيمەملەكەتتىك سەكتوردىڭ شوتتارىندا جاتقان قاراجاتتاردى قولدانۋدى رەگلامەنتتەۋ. ول، قالدىقتاردى بيۋدجەت كىرىسىنە قايتارۋ نەمەسە وسى سۋبەكتىلەردىڭ باسقا ينۆەستيتسيالىق جوبالارىن قارجىلاندىرۋعا رۇقسات بەرۋ ارقىلى شەشىمىن تابادى. جوسپارلاۋ كەزىندە قارجى-ەكونوميكالىق نەگىزدەمەدە كورسەتىلگەن سومانىڭ ءبارىن بىردەن بەرمەي، كەزەڭ-كەزەڭىمەن قاراستىرامىز.
تورتىنشىدەن، بيۋدجەتتىك ينۆەستيتسيالىق جوبالاردى ىسكە اسىرۋعا جەكە ينۆەستورلاردى تارتۋ ءۇشىن مەملەكەتتىك- جەكەمەنشىك ارىپتەستىك جوبالارىن جوسپارلاۋ راسىمدەرى وڭتايلاندىرىلادى.
بەسىنشىدەن، نىسانالى دامۋ ترانسفەرتتەرى بويىنشا ناتيجەلەر تۋرالى كەلىسىم الىنىپ تاستالادى. ءبىراق ولاردى پايدالانۋدا قول جەتكىزىلگەن تىكەلەي جانە تۇپكىلىكتى ناتيجەلەر تۋرالى ەسەپتى ەنگىزۋ قاراستىرىلدى. وسى ايتقان شارالاردىڭ ناتيجەسىندە قاراجاتتىڭ ناقتى ەكونوميكاعا تەز جەتۋىنە جاعداي جاسالادى»، - دەپ اتاپ ءوتتى باقىت سۇلتانوۆ.
