ديماش استانادا وتەتىن كونسەرتىنە قاتىساتىن الەمدىك جۇلدىزداردى تانىستىردى - فوتو
بۇل تۋرالى ول ينستاگرامداعى پاراقشاسىندا حابارلادى. «استانا-ارەنادا وتەتىن Bastau اتتى كەشىمە از كۇن قالدى! شىعارماشىلىعىمدى قولداپ، باتا بەرۋگە اسىققان مىڭداعان كورەرمەنىمە ريزامىن! شوۋ-كونسەرت الدىندا ەتيكا بويىنشا قۇرمەتتى قوناق بولىپ قاتىسقالى جاتقان انشىلەردى تانىستىرۋعا رۇقسات ەتىڭىزدەر! مەنىڭ كەشىمە كەلگەن ءار قوناق - ەلىمىزدىڭ قوناعى، ءسىزدىڭ ۇيىڭىزگە كەلگەن قوناق دەپ قابىل الىڭىز! شىن جۇرەكپەن، دوستىق نيەتپەن قارسى الايىق!»، - دەپ جازادى ول.
ال، ديماش قۇدايبەرگەننىڭ رەسمي وكىلى الپامىس شاريموۆتىڭ ينستاگرام پاراقشاسىندا جاريالانعان حابارلامادا كەشكە كەلەتىن قۇرمەتتى ءانشى قوناقتار تانىستىرىلعان:
«تەرري لين - قىتاي ەلى.
قىتاي ەلىنىڭ ەڭ جارىق جۇلدىزى. I اm Singer جوباسىندا ديماشقا قارسىلاس بولا ءجۇرىپ، قامقورلىعىن تانىتىپ، قىتاي ەلىنىڭ جۇلدىزدارىنىڭ ىشىندە دوستىق نيەتىن تانىتقان العاشقى انشىلەردىڭ ءبىرى.
ديماشتىڭ تۋعان كۇنىندە جەكە كونسەرتتىك كيىمىن سىيعا تارتىپ، ارنايى تىلەگىن دە ءبىلدىردى. ءتىپتى، ديماش تەرري ءليندى «قىتايلىق وكىل اكەم» دەپ اتاپ كەتتى.
كوپ مارتە ازيالىق ماراپاتتاردىڭ جۇلدەگەرى تەرري لين - 27- ماۋسىم كۇنى وتەتىن Bastau اتتى كەشتىڭ قۇرمەتتى قوناعى!
Loreen - شۆەتسيا.
«ەۆروۆيدەنيە 2012» بايقاۋىنىڭ جەڭىمپازى، دانس-پوپ، يەۆرودەنس جانرىندا ءان شىرقايتىن تانىمال ەۆروپا ءانشىسى.
اتى شۋلى Warner Music لەيبلىمەن سەرىكتەستىكتە قىزمەت اتقاراتىن لوريننىڭ 2012-جىلعى «Heal» البومى ەۆروپانىڭ بارلىق ءان شەرۋلەرىندە توپ جاردى.
ەۆروپانىڭ سالەمىن بىزگە ديماشتىڭ ءان كەشىندە لورين جەتكىزەتىن بولادى!
ەليت-بەكستور سوفي - ۇلى بريتانيا.
1997-جىلدان بەرى شىعارماشىلىقپەن اينالىسىپ كەلە جاتقان الەمنىڭ تانىمال ءانشىسى. كوپتەگەن تانىمال اندەردىڭ اۆتورى، سازگەر.
تانىمال ءسان برەندتەرىنىڭ جارناماسى ونىڭ انىمەن سۇيەمەلدەنىپ، ال سۇلۋ بەينەسى جارنامانىڭ وزىنە اينالدى! ەليس-بەكستور سوفي قازاقستاندا العاش رەت ديماشتىڭ جەكە ءان كەشىندە قوناققا كەلەدى!
كريستينا ورباكايتە - رەسەي.
كورشى ەلدىڭ ىستىق سالەمىمەن «رەسەي فەدەراتسياسىنىڭ ەڭبەك سىڭىرگەن ءارتىسى»، «Top Hit awards» ماراپاتىنىڭ جۇلدەگەرى كريستينا ورباكايتە ديماشتىڭ كونسەرتىنە ارنايى كەلە جاتىر. «سلاۆيان بازارىندا» ديماشقا جەڭىس سىيلاعان اندەردىڭ ءبىرى «وپيات مەتەل» ءانى كريستينا مەن ديماشتىڭ دۋەتىندە قالاي شىرقالادى ەكەن؟
27- ماۋسىم بىرگە تاماشالايتىن بولامىز!
مايرا مۇحامەد قىزى - قازاقستان رەسپۋبليكاسىنىڭ ەڭبەك سىڭىرگەن ءارتىسى، مەملەكەتتىك سىيلىقتىڭ لاۋرەاتى».
ايتا كەتەيىك، بۇعان دەيىن ديماش استانا قالاسىندا «سالەم» اتتى انىمەن بەينەروليك ارقىلى جانكۇيەرلەرى اراسىندا كونكۋرس جاريالاعانىن حابارلاعان بولاتىنبىز.
