اياعىنان ايىرىلعان قازاقستاندىق ءبيشى تۋرالى فيلم جارىققا شىقتى

قانات بەيسەكەيەۆتىڭ «مەن بيلەگىم كەلەدى» كارتيناسىنىڭ پروتوتيپى - الماتىلىق دميتري كيم.

تۋىندى ءبيشىنىڭ ءومىربايانىنا نەگىزدەلىپ تۇسىرىلگەن.

بەلگىلى ونەرپاز دميتري كيم شەتەلدى باعىندىرۋ جوسپارىن رەسەيدەن باستايدى. كەيىن امەريكاعا ساپار شەگەدى.

امەريكادا ءوزىنىڭ تالانتىنىڭ ارقاسىندا تانىلىپ، ەندى كەلىسىمدەرگە قول قويۋعا بولادى دەپ جۇرگەندە قايعىلى جاعدايعا دۋشار بولادى. سالدارىنان جاس جىگىت ءبىر اياعىنان ايرىلىپ قالادى.

«بۇل جۇمىسىم الدىڭعىلاردان گورى وزگەشە. مەن ديما تۋرالى بيىل ناۋرىزدا ءبىلدىم. دوستارىم Facebook پاراقشاسىنداعى پوستتارىن ماعان جىبەرىپ تۇراتىن. ونىڭ وقيعاسىمەن مۇقيات تانىسقان سوڭ قالىڭ ويعا باتتىم. ەرتەڭىنە لوس- اندجەلەسكە بيلەت الىپ، ديمامەن كەزدەستىم. ەكەۋمىز بىرگە جۇمىس ىستەي باستادىق. كەيىن مەن الماتىعا كەتتىم. 2 ايدان سوڭ قايتىپ باردىم. دميتري وسى از عانا ۋاقىت ارالىعىندا ادام سەنگىسىز ناتيجەلەرگە قول جەتكىزگەنىن كوردىم»، - دەدى رەجيسسەر قانات بەيسەكەيەۆ.

 قاناتتىڭ ايتۋىنشا، العاشىندا دميتري ءوزىنىڭ قانداي قيىن جاعدايدى باسىنان كەشكەنى تۋرالى كوپ ايتقىسى كەلمەيتىن.

«مونولوگتى ءبىرىنشى دۋبلدەن جازۋىمىزدى وتىنەتىن. مەن تۇسىنىستىكپەن قارادىم. كەز كەلگەن ادام وتكەنىن ايتقىسى كەلمەيدى. فيلم ءتۇسىرىلىمى بارىسىندا ەكەۋمىز دوستاسىپ كەتتىك»، - دەدى ول.

 دەرەكتى فيلمنىڭ ۇزاقتىعى 15 مينۋت. مونتاجداۋ جۇمىستارى الماتىداعى پرەمەرا بولاتىن كۇنى تاڭەرتەڭ اياقتالعان.

جاقىن ارادا لوس- اندجەلەستەگى ورىس ءتىلدى اۋديتورياعا كورسەتىلەدى. ولاردىڭ اراسىندا العاش رەت باس كەيىپكەردىڭ ءوزى تاماشالايتىن بولادى. Youtube ارناسىنا 1-ايدان سوڭ ورنالاستىرىلادى.

«وسىنداي وقيعالار كوپ ادامدى قايىرىمدىلىققا ۇندەيتىنى ءسوزسىز. باسىڭا نە تۇسسە دە قوعامنىڭ اياۋشىلىعىنا تۇرمايتىن نارسە ەكەنىن ءتۇسىنۋ كەرەك. ديمانىڭ تاريحى - عاجاپ دۇنيە. ونىڭ ومىرگە دەگەن قۇشتارلىعى، كۇرەسكەرلىگى مەنى ءتانتى ەتتى»، - دەدى قانات بەيسەكەيەۆ.

بولاشاقتا كينورەجيسسەر اۋىل مەكتەبى تۋرالى فيلم ءتۇسىرۋدى جوسپارلاپ وتىر.

«تولىق مەتراجدى فيلم تۇسىرۋگە قۇلقىم جوق. مەنى تەك وتانداستارىمنىڭ شەتەلدەگى جەتىستىكتەرى قىزىقتىرادى. ولار شەتەلدىك بولسا دا كوپ جەتىستىككە جەتىپ جاتىر. بۇل ولاردىڭ پاتريوتتىق سەزىمى»، - دەدى رەجيسسەر.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى