توي- دۋماندا قۇشاقتاسىپ سۋرەتكە تۇسكەن اقتوبەلىك شەنەۋنىكتەر تارتىپتىك جازاعا تارتىلدى
كوبى توي- دۋماندا، دەمالىستا سۋرەتكە ءتۇسىپ، الەۋمەتتىك جەلىگە جۇكتەگەنى ءۇشىن جازالاندى، دەپ حابارلايدى قازاقپارات ءتىلشىسى.
ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ وبلىستىق دەپارتامەنتى وڭىردەگى 5 مىڭنان استام مەملەكەتتىك قىزمەتشىنىڭ جۇمىسىن باقىلاپ وتىر. جات قىلىق كورسەتكەندەرى انىقتالىپ، ادەپ كودەكسىنە ساي جازالانادى. قادامىن شالىس باساتىن شەنەۋنىكتەر از ەمەس. ماسەلەن، شالقار اۋداندىق مەملەكەتتىك كىرىستەر باسقارماسىنىڭ باسشىسى الىبەكوۆ سۋپەرماركەت ىشىنە كىرىپ، تەگىن ىشىمدىك بەرۋدى تالاپ ەتكەن. ادەپ كودەكسىن بۇزعان شەنەۋنىك تارتىپتىك جازاعا تارتىلدى.
«ىرعىز اۋداندىق اۋىل شارۋاشىلىعى ءبولىمىنىڭ باس مامانى وماروۆ اۆتوكولىكتى ماس كۇيىندە جۇرگىزگەنى ءۇشىن تارتىپتىك جازاعا تارتىلدى. مەملەكەتتىك قىزمەتشىلەردى كەشەندى اتتەستاتسيادان وتكىزۋ كەزىندە مەملەكەتتىك قىزمەتشىلەرىمىزدىڭ ىشىمدىك ىشكەن كۇيدە كولىك جۇرگىزگەنى ءۇشىن اكىمشىلىك جاۋاپكەرشىلىككە تارتىلعاندارى انىقتالدى. سونىمەن قاتار، اقتوبە قالالىق تۇرعىن ءۇي قورىن ەسەپكە الۋ سەكتورىنىڭ مەڭگەرۋشىسى دۇيسەكەنوۆا ازاماتتارعا دورەكى سويلەگەنى ءۇشىن ەسكەرتۋ تۇرىندەگى تارتىپتىك جازاعا تارتىلدى»، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ وبلىستىق دەپارتامەنتى باسشىسىنىڭ ورىنباسارى ميرا بيبىتوۆا.
قازىرگى كەزدە مەملەكەتتىك قىزمەتشىلەردىڭ الەۋمەتتىك جەلىلەردەگى پاراقشالارى قاتاڭ باقىلاۋعا الىندى. مونيتورينگ جۇرگىزىلىپ، مەملەكەتتىك قىزمەتكەرشىلەردىڭ ويىن- ساۋىق جانە شەتەلدەردەگى دەمالىس ورىندارىنداعى فوتوسۋرەتتەرى ءوشىرىلدى. ولاردىڭ اراسىندا ءىرى باسقارما قىزمەتكەرلەرى دە بار. ماسەلەن، الەۋمەتتىك جەلىدەن اقتوبە وبلىسى بويىنشا تەكسەرۋ كوميسسياسى، كاسىپكەرلەك، جەر قويناۋىن پايدالانۋ مەن قورعالۋىن باقىلاۋ، كولىكتىك باقىلاۋ، مەملەكەتتىك ساتىپ الۋلار، مادەنيەت، مۇراعاتتار جانە قۇجاتتاما، تىلدەردى دامىتۋ، قۇرىلىس، ساۋلەت جانە قالا قۇرىلىسى باسقارمالارى مەن اقتوبە وبلىسى بويىنشا ورمان شارۋاشىلىعى مەن جانۋار دۇنيەسى اۋماقتىق ينسپەكتسياسى قىزمەتكەرلەرىنىڭ سۋرەتتەرى الىنىپ، ولار تارتىپتىك جازاعا تارتىلدى.
«تويعا باراسىڭ، تۋىسقانىڭ سۋرەتكە ءتۇسىرىپ، الەۋمەتتىك جەلىگە سالىپ جىبەرەدى. كەيدە بۇل ادەپ كودەكسىنىڭ تالاپتارىنا ساي كەلمەيدى. ءبىز مونيتورينگ جۇرگىزگەن سوڭ بۇل ءۇردىس ساپ تىيىلدى. ءبارى مويىندادى، جازالاندى. كوبىنە دوسىمەن قۇشاقتاسىپ تۇسكەن سۋرەتتەر سالىنعان. سەلفي جاساپ، ەرنىن شىعارعان، قولىن شوشايتىپ تۇرعان. ءتىپتى دەمالىستا سۋ جاعاسىندا كۋپالنيكپەن تۇسكەن سۋرەتتەرى بار. بىلمەستىكتەن سۋرەتىن سالدى، قازىر الىپ تاستادى»، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ وبلىستىق دەپارتامەنتى باسشىسى ق. توقىشيەۆ.
ايتا كەتەيىك، بيىل مەملەكەتتىك قىزمەتشىلەرگە قاتىستى 28 تارتىپتىك ءىس قارالدى. ونىڭ 10-ى ادەپ كودەكسىنىڭ تالاپتارىن بۇزعان.
«مەملەكەتتىك قىزمەتشىلەردىڭ قىزمەتتىك اۆتوكولىكتى جەكە ماقساتتا پايدالانۋى ادەتكە اينالعانىن كورسەتىپ وتىر. ماسەلەن، №11 شىعىس سپورت تۇرلەرى بويىنشا بالالار جانە جاسوسپىرىمدەر مەكتەبىنىڭ ديرەكتورى قىزمەتتەن تىس ۋاقىتتا دەنە شىنىقتىرۋ جانە سپورت باسقارماسىنا بەكىتىلگەن كولىكتى جەكە ماقساتتا پايدالانعان. سونىمەن قاتار، اقتوبە قالاسى اكىمىنىڭ اپپارات باسشىسى مەن وبلىستىق كاسىپكەرلىك باسقارماسى دا جەكە جۇمىستارىنا قىزمەتتىك كولىكپەن جۇرگەن»، - دەدى م. ءبيبىتوۆا.
اۆتور: التىناي ساعىندىقوۆا
