انكارادا جىر الىبى جامبىل جابايەۆتىڭ اتىنا كوشە بەرىلدى
باۋىرلاس ەل قازاقستان مەن تۇركيا اراسىندا قارىم- قاتىناس كوكجيەگى كەڭەيىپ، جىل سايىن جاڭا بەلەسكە كوتەرىلىپ كەلەدى. مىسالى، وسىدان ەكى جىل بۇرىن تۇركيا استاناسى انكارا قالاسىندا ايتىس ونەرىنىڭ ءدۇلدۇلى ءسۇيىنباي ارون ۇلىنىڭ ساياباعى اشىلسا، بىلتىر اقيىق اقىننىڭ ەڭسەلى ەسكەرتكىشى ورناتىلعان بولاتىن. مىنە، بۇگىن وسى ساياباقتىڭ وڭ جاعىنداعى كوشەگە جىر الىبى جامبىل جابايەۆتىڭ ەسىمى بەرىلدى. انكارا مۋنيتسيپاليتەتى بۇل ءىس- شارا باۋىرلاس ەكى ەلدىڭ ىنتىماقتاستىعىن ودان ارى نىعايتادى دەپ وتىر.
مۇستافا اق، كەچيورەن اۋدانىنىڭ مەرى:
- ءسۇيىنباي ساياباعىنا الىپ كەلەتىن كوشەگە اقىن، جىراۋ جامبىل جابايەۆ ەسىمىن بەرىپ، ءبىر قاۋىم ەل بولىپ، اشىلۋ سالتاناتىن وتكىزدىك. وسىلايشا، قوس الىپ تۇلعانىڭ ەسىمىن ارداقتاپ، قولىمىزدان كەلگەنشە ۇلىقتاپ جاتىرمىز. اۋدان حالقى مۇنى زور قوشەمەتپەن قارسى الىپ، ىستىق لەبىزدەرىن دە ءبىلدىردى. ارينە، بۇل جايت ءبىزدى ەرەكشە قۋانتتى. ويتكەنى ءسۇيىنباي دا، جامبىل دا تەك قازاق ەلىنىڭ عانا ەمەس، كۇللى تۇركى جۇرتىنىڭ ماقتانىشى.
ابزال ساپاربەك ۇلى، ق ر تۇركياداعى توتەنشە جانە وكىلەتتى ەلشىسى:
- بۇل، ارينە، ءبىرىنشى ءىس- شارا ەمەس. بۇدان بۇرىن كوپتەگەن قازاقتىڭ دارا تۇلعاسى ءۇشىن وسىنداي اتاۋلى شارالار وتكىزىلدى، ەسىمدەر بەرىلدى، كىتاپتار شىعارىلدى، مۇسىندەر جاسالىندى. مىنە، وسى جۇمىستىڭ جالعاسى رەتىندە جامبىل اتامىزدىڭ ارنايى كوشەسىن اشىپ وتىرمىز. جالپى قازاق ءۇشىن رۋحاني قۇندىلىعى وتە جوعارى دارا تۇلعا. ءاربىر تىلەگىمىزدە، باتامىزدا ەسىمىن قوسىپ، تىلەك ايتامىز. سول سەبەپتى تۇركيا جەرىندە وسى شارانى جاساپ وتىرمىز.
كەچيورەن - 1 ميلليوننان استام تۇرعىنى بار انكارا قالاسىنىڭ ەڭ ءىرى اۋداندارىنىڭ ءبىرى. ال ونىڭ اۋماعىندا جامبىل كوشەسىن اشۋ جونىندەگى ۇسىنىس قالالىق ءماسليحاتتا قارالىپ، ءبىراۋىزدان بەكىتىلىپتى. ءتىپتى بۇل شەشىمنىڭ قابىلدانۋىنا جەرگىلىكتى حالىقتىڭ قىزۋ قولداۋى ىقپال ەتكەن كورىنەدى. ويتكەنى اشىلۋ سالتاناتىندا ءسوز العان تۇرىك ەلىنىڭ زيالى قاۋىم وكىلدەرى اۋدان تۇرعىندارىنا ايرىقشا العىس ءبىلدىردى. ونىڭ ۇستىنە اتالعان شارا اياسىندا كەچيورەن اۋدانى مەن الماتى وبلىسىنىڭ جامبىل اۋدانى اراسىندا باۋىرلاستىق تۋرالى مەموراندۋمعا قول قويىلدى. الداعى ۋاقىتتا قوس اۋدان اراسىندا ءوزارا ارىپتەستىك بايلانىستار جاڭا قارقىنمەن دامي تۇسپەك.
جانداربەك دالابايەۆ، الماتى وبلىسى، جامبىل اۋدانىنىڭ اكىمى:
- بۇگىن ۇلكەن تاريحي وقيعانىڭ كۋاسى بولىپ وتىرمىز. انكارا قالاسىندا جامبىل بابامىزدىڭ كوشەسى اشىلۋدا. ارينە، بۇل - ەلدىڭ مەرەيى، ەلدىڭ بەدەلى، حالىقتىڭ بەدەلى. ەلباسىمىزدىڭ كەشە عانا «بولاشاققا باعدار: رۋحاني جاڭعىرۋ» ماقالاسىنىڭ جالعاسىن تاپقان كورىنىسى دەپ ايتۋعا بولادى.
سالتاناتتى جيىن الماتى مەن وڭتۇستىك قازاقستان وبلىسى ونەرپازدارىنىڭ قاتىسۋىمەن وتكەن ءدۇبىرلى كونسەرتكە ۇلاستى. جيىلعان كوپشىلىك حالىق اندەرى مەن جىر- تەرمەلەرىن تىڭداپ، رۋحاني ازىق الىپ قايتتى.
اۆتورلارى: ەرجان ءجۇنىس، سەدات دەنلي
www.24.kz
