قازاقستان الداعى ۋاقىتتا قۇرىلىس ماتەريالدارىن ەكسپورتقا شىعاراتىن ەلگە اينالادى

بۇل تۋرالى بۇگىن حالىقپەن ەسەپتىك كەزدەسۋىن وتكىزگەن ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات.

«شىعارىلعان ونىمدەر ەكسپورتقا باعىتتالعان بولۋى شارت. بۇل بۇگىنگى كۇننىڭ ەڭ وزەكتى ماسەلەسى. ءبىراق، جاسىراتىنى جوق، قازاقستان ءارتۇرلى قۇرىلىس ماتەريالدارىن شەتەلدەن يمپورتتاپ وتىر. ال ءوز كەزەگىندە قازاقستان قۇرىلىس ماتەريالدارىن شەتەلگە ەكسپورتتاپ جاتىر ما؟» - دەپ سۇرادى مينيستردەن اتىراۋ تۇرعىنى ەسەپتىك كەزدەسۋ بارىسىندا.

ساۋالعا جاۋاپ بەرگەن مينيستر ەلىمىزدىڭ قۇرىلىس سەكتورىنىڭ ءوسۋى بايقالىپ وتىرعانىن، وسى جىلدىڭ العاشقى توقسانىندا بۇل سالاداعى ءوسىم 6,7 پروتسەنت بولعانىن اتاپ ءوتتى.

«قۇرىلىس ماتەريالدارىن جاساۋ سەكتورىندا، وڭدەۋدە ءوسىم 7 پروتسەنتتى قۇرادى. قازاقستاندا كوپ قاباتتى ءۇي سالىنعاندا 70-80 پايىزى ءوزىمىزدىڭ ماتەريال قولدانىلادى. ال جەكەمەنشىك ءۇي سالعاندا بۇل كورسەتكىش 90 پايىزدان اسادى. ەندى ول شەتەلگە شىعا ما، جوق پا؟ شىعادى. بۇگىنگى كۇنى گيپسوكارتون، بوياۋلار، بيتۋم سىندى تاۋارلار شىعارىلادى. جىل سايىن ەكسپورتقا شىعارىلاتىن تاۋار كولەمى ارتىپ كەلەدى. بولاشاقتا ورتالىق ازيادا وسى سالانى دامتىىپ، شەتەلگە قۇرىلىس ماتەريالدارىن شىعاراتىن مەملەكەتتەردىڭ بىرىنە اينالامىز دەپ جوسپارلاۋدامىز»، - دەدى جەڭىس قاسىمبەك.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى