سال اۋرۋىنا شالدىققان بويجەتكەن كينوعا تۇسپەك - فوتو
الەۋمەتتىك جوبانى «قازاق فيلم» كينوستۋدياسى قولعا الدى، دەپ حابارلايدى قازاقپارات.
مۇمكىندىگى شەكتەۋلى جاندار تۋرالى الەۋمەتتىك فيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلمەك.
«قىز بەن تەڭىز» فيلمىندە سەرەبرالدى سال اۋرۋىمەن اۋىراتىن اسەل ەسىمدى بويجەتكەننىڭ ءومىرى باياندالادى. ونىڭ بار ارمانى - ماحابباتىن كەزدەستىرىپ، وتباسىن قۇرۋ. ۋاقىت وتە اسەل ب ت س پ- مەن اۋىراتىن تاحير ەسىمدى جىگىتتى كەزدەستىرىپ، ءومىرى وزگەرەدى.
فيلمنىڭ رەجيسسەرلەرى ءارى سەناري اۆتورلارى - مۇحامەد مامىربەكوۆ جانە ءازيزجان زايروۆ. «قىز بەن تەڭىز» فيلمى - مۇمكىندىگى شەكتەۋلى جاستاردىڭ ءومىرىن باياندايتىن «شەكسىز مۇمكىندىك» ديلوگياسىنىڭ ەكىنشى ءبولىمى.
«بولسام با الدە بولماسام با» اتتى ءبىرىنشى ءبولىم ارقىلى ءبىز ب ت س پ- مەن اۋىراتىن جاس جىگىتتىڭ ءومىرىن كورسەتۋگە تىرىستىق. ال وسى فيلمدە بويجەتكەننىڭ ءومىرىن كورسەتەمىز. فيلم نەگىزىنە «اردي» وڭالتۋ ورتالىعىنىڭ تاربيەلەنۋشىسى دينارا شاريپوۆانىڭ ءومىرى الىنعان.
كارتينادا ول باستى ءرولدى سومدايدى. دينارا ءوزىنىڭ ومىرگە دەگەن كوزقاراسىمەن، ومىرسۇيگىشتىگى جانە مىنەزىنىڭ جۇمساقتىعىمەن ەرەكشەلەنەدى. ءوزىنىڭ اۋرۋىنا قاراماستان ول تولىققاندى ءومىر سۇرەدى. جوعارعى ءبىلىم الىپ، قالاداعى بانكتەردىڭ بىرىندە جۇمىس ىستەيدى.
شىعارماشىلىققا دا وتە جاقىن، اياعىمەن سۋرەتتەر سالىپ، دەنى ساۋ ادامدارعا ءوز-وزىنە سەنۋگە كومەكتەسەدى. فيلمدە ءبىز ونىڭ شەكسىز ىشكى جان دۇنيەسىن اشىپ كورسەتپەكپىز، - دەدى فيلمنىڭ رەجيسسەرى ءارى پروديۋسەرى ءازيزجان زايروۆ.
ايتا كەتسەك، فيلمدە باستى رولدەردى «اردي» وڭالتۋ ورتالىعىنىڭ وقۋشىلارى سومدايدى. مىسالى، ديلوگيانىڭ ءبىرىنشى بولىمىندە باستى ءرولدى سومداعان اكتەر، ب ت س پ- مەن اۋىراتىن تاحير وماروۆ وينايدى. سونداي-اق، فيلمگە ەمير بايعازيننىڭ «ءتورت وقيعا» فيلمىندە باستى ءرولدى سومداعان قاناعات تاسقارايەۆ تا تۇسەدى.
«بۇل كارتينا ارقىلى ءبىز كورەرمەندەرگە تەك مۇگەدەك جاستاردىڭ عانا ەمەس، مۇمكىندىگى شەكتەۋلى بارلىق جانداردىڭ كۇندەلىكتى پروبلەمالارىن اشىپ كورسەتپەكپىز. قوعامدا ءوز ورنىن تاۋىپ، تەڭ مۇشەسى بولۋ ءۇشىن وسىنداي ادامداردىڭ ومىرىمەن، تىنىس-تىرشىلىگىمەن تانىسقاننان كەيىن، كورەرمەن ولارعا تۇسىنىستىكپەن قاراپ، ءتىپتى وزدەرىنىڭ كۇشىنە دە سەنە الادى.
ءبىزدىڭ تۋىندى تەك مۇگەدەكتەرگە عانا ەمەس، سونىمەن قاتار بارلىعىمىزعا دا ارت-تەراپيا بولماق، - دەدى رەجيسسەر مۇحامەد مامىربەكوۆ.
2017-جىلدىڭ ساۋىرىنەن باستاپ رەجيسسەرلىك سەناري جازىلىپ، فوتو جانە بەينە بايقاۋلار جاسالىپ، ءتۇسىرىلىم لوكاتسيالارى انىقتالدى. ءازيزجان زايروۆتىڭ ايتۋىنا قاراعاندا، دايىندىق كەزەڭى بارىسىندا بارلىق دەپارتامەنت وكىلدەرىمەن، ونىڭ ىشىندە قويۋشى سۋرەتشىمەن، وپەراتور جانە جارىق تۇسىرۋشىلەرمەن ۇلكەن جۇمىس اتقارىلعان. وعان قوسا، رەجيسسەر فيلمنىڭ اكتەرلەرىنىڭ ديكتسياسىن دۇرىس قويۋ ءۇشىن، كۇندەلىكتى لوگوپەدتەر جۇمىس ىستەگەنىن ايتتى. فيلم الماتىدا تۇسىرىلمەك.
اۆتور: گۇلميرا عوسمانالي
