دجەكي چان: مەن جىندىمىن، ءبىراق توپاس ەمەسپىن
* مەن ەشقاشان ەكىنشى بريۋس لي بولۋعا تىرىسقان ەمەسپىن. مەنىڭ بار بولعانى ءبىرىنشى دجەكي چان بولعىم كەلەدى.
* قاۋىپتى تريۋكتەر جاسار الدىندا مەنەن ءبارى: "دجەكي، قورقىپ تۇرعان جوقپىسىڭ؟ " دەپ سۇرايدى. ارينە، قورقام. نە، مەنى سۋپەرمەن دەپ ويلاپ پا ەدىڭدەر؟
* كەيدە كينودا جاعىمسىز كەيىپكەردى دە ويناعىم كەلەتىن ساتتەر بولادى. كەيدە، ءتىپتى، كينودا ءولىپ قالعىم كەلەدى.
* مەن - پەرىشتە ەمەسپىن. مەنىڭ دە جامان ادەتتەرىم كوپ- اق.
* كۇندەردىڭ كۇنىندە ءبىر گولليۆۋدتىق پروديۋسەر نەمەسە رەجيسسەر ماعان تازا درامالىق دۇنيە جاساۋعا ۇسىنىس جاسايتىنىنان ءالى دە ءۇمىتتىمىن.
* ەگەر ساعان شەكتەن تىس ەركىندىك بەرىلسە، سەن قازىرگى گونكونگ سياقتى بولاسىڭ. ياعني، شەكتەن تىس بەي- بەرەكەت.
* كورەرمەندى ءتۇسىنۋ قيىن. نەنى ۇناتادى، نەنى جەك كورەدى - ءبىلىپ بولمايسىڭ. ءبىر كينولارىم وزىمە ەرەكشە جاقىن، ءبىراق كورەرمەگە وتپەي قالادى. ەندى ءبىر دۇنيەم وزىمە جاقپايدى، دەگەنمەن، بوكس وفيستى قىرىپ جاتادى. قىزىق.
* مەن جىندىمىن، ءبىراق توپاس ەمەسپىن.
* مەنىڭشە، قازىرگى ەڭ ماڭىزدى فيلمدەر - وتباسىلىق فيلمدەر.
* كەيدە مەن تاڭعى بەسكە دەيىن كەزلەسۋلەردە بولام. سوسىن ەكى ساعات ۇيىقتاپ، قايتادان ءتۇسىرىلىم الاڭىنا كەتۋىم كەرەك بولادى. سونداي ساتتە وزىمنەن سۇرايمىن: وسىنىڭ ءبارى نە ءۇشىن؟
* مەنى دجەكي چان ەتكەن - ەڭبەك. اۋىر ەڭبەك. جۇرتتىڭ ءبارى ۇيىقتاپ جاتقاندا، مەن جاتتىعۋ الاڭىندا جۇرەتىنمىن.
* كورەرمەننىڭ كوڭىلىن كوتەرۋدەن بولەك، مەنىڭ كينو ارقىلى تاربيەلىك دۇنيەلەردى دە سىڭىرگىم كەلەدى. بىلەسىز بە، پروديۋسەر نەمەسە رەجيسسەر رەتىندە ءبىزدىڭ قوعام الدىندا ۇلكەن جاۋاپكەرشىلىگىمىز بار.
