قازاقستاندا ورمانشىلاردىڭ ەڭبەك اقىسى وسەتىن بولدى
بۇل تۋرالى سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مۇشەسى راشيت اكىموۆ ءمالىم ەتتى، دەپ حابارلايدى قازاقپارات.
«اگرارلىق كوميتەتتىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر مەن جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمعا شىعارىپ وتىرمىز. ارينە، زاڭ جوباسىنا قاتىستى ءتۇرلى پىكىرلەر بولدى، ەندى ونى 1- ماۋسىمدا ەكىنشى وقىلىمدا تالقىلاۋ جوسپارى بار. اتاپ ايتقاندا، ونداعى وزگەرىستەر الەۋمەتتىك ماسەلەلەردى قامتىپ وتىر، ياعني 2019-جىلدىڭ 1- قاڭتارىنان ورمان شارۋاشىلىعىندا قىزمەت ەتىپ جۇرگەندەردىڭ جالاقىسىن 25 پايىزعا ءوسىرۋ ەسكەرىلگەن. وزدەرىڭىز بىلەسىزدەر، ەڭ تومەنگى ەڭبەك اقىنىڭ ءبىرى وسى سالاداعى ادامدارعا تيەسىلى ەدى»، - دەدى سەناتور.
ونىڭ سوزىنە قاراعاندا، بۇل باعىتتاعى قادامدار ورمان شارۋاشىلىعىنىڭ ساقتالۋى مەن دامۋىنا وزىندىك وڭتايلى اسەرىن تيىگىزەدى. بۇدان بۇرىن ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ قوسىمشا شىعىنداردى قاجەت ەتەتىن ۇسىنىستار رەسپۋبليكالىق بيۋجەتتىك كوميسسيادا قارالىپ، ءىشىنارا قولداۋ تاپقانىن، وسى ورايدا ورمان شارۋاشىلىعى قىزمەتكەرلەرىنىڭ جالاقىسىن 25 پايىزعا كوبەيتۋگە ۇكىمەتتىڭ كەلىسىمى بار ەكەندىگىن حابارلاعان بولاتىن.
