جەتىسۋلىق تۇلەكتەر اۋىلداستارىنا تاماشا تارتۋ جاسادى

20 جىلدىق كەزدەسۋگە جينالعان ولار، جەرلەستەرىنە ەرەكشە تارتۋ جاسادى. اۋىلداستارىنا زاماناۋي ساحنا سىيلادى. الاكول كولىنىڭ جاعالاۋىن مەكەندەگەن كوكتۇمالىقتار ءۇشىن بۇل تاماشا سىي بولدى. اشىق اسپان استىنداعى جاڭا ساحنادا العاش بوپ اتاقتى ايتىسكەر اقىندار ونەر كورسەتتى، دەپ حابارلايدى قازاقپارات ءتىلشىسى.

اينۇر تۇرسىنبايەۆا، سارا توقتامىسوۆا، ايتاقىن جانە جانداربەك بۇلعاقوۆتار، بالعىنبەك يماشەۆ، سەرىكزات دۇيسەنعازين سىندى ازۋلى التى اقىن جىر جارىستىرىپ، تويدى تويعا جالعادى. 11  جىل بىرگە وقىعان سىنىپتاستارىمەن 20 جىلدىق كەزدەسۋگە الماتى وبلىسى اكىمنىڭ ورىنباسارى دا كەلدى. جاقسىلىق ومار ءبىلىم شاڭىراعىنىڭ 1997- جىلعى تۇلەگى. اسەرلى باسقوسۋدا ايماق باسشىسىنىڭ سالەمىن جەتكىزىپ، ادەمى تىلەك ايتىپ، وقۋشى كەزدەرىن ەسكە الىستى. «جەلكىلدەپ ءوسىپ كەلە جاتقاندا 7-8 سىنىپتا توقىراۋ زامانعا تاپ بولدىق. كيەتىن كيىم، ىشەتىن اسقا زار بولعان ۋاقىتتار بولعان. مەكتەپتە جىلۋ جوق، كىتاپ جەتىسپەدى. ال ۇيلەردە جارىق جوق. بارلىعى قيراپ تۇردى. مەكتەپتىڭ توبەسىنەن جاڭبىر تامباسىن دەپ جىگىتتەر جازعى دەمالىسىمىزدى توبە جاماۋ جۇمىسىنا ارناعان كەزدەر بولدى»، دەگەن جاقسىلىق ومار بۇگىنگى جاس تولقىنعا بارلىق جاعداي جاسالىپ وتىرعانىن جەتكىزدى.

تەك "وقىڭدار" دەپ اعالىق اقىلىن ايتتى. مەكتەپتىڭ ماتەريالدىق- تەحنيكالىق بازاسىن نىعايتۋ ماقساتىندا ءبىلىم ورداسىنا وبلىس اكىمدىگى "گازەل" اۆتوكولىگىن سىيعا تارتتى. «ءبىزدىڭ كوكتۇما اۋىلى اۋدان ورتالىعىنان 70 شاقىرىم الىستا ورنالاسقان. بۇرىن وقۋشىلاردى جارىستارعا تاكسي جالداپ جەتكىزىپ جۇردىك. ەندى مىنا اۆتوكولىكپەن ءۇشارال، تالدىقورعان، الماتىداعى ءبىلىم ، سپورتتىق باسەكەلەرگە الاڭسىز جەتە الامىز. بۇل سىيلىققا ۇجىم بولىپ ەرەكشە قۋانىپ تۇرمىز»، - دەدى مەكتەپ ديرەكتورى الماگۇل قاسىمحانوۆا.

كوكتۇما قازاق ورتا مەكتەبى 80 جىلدىق تاريحى بار قارا شاڭىراق. مىڭداعان شاكىرتتى سامعاتىپ ۇشىرعان ءبىلىم ورداسى. ال بيىل 15 وقۋشى مەكتەپ ءبىتىردى.

اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى