ورىس قىزى باتىرلار جىرىن جاتقا ايتىپ تاڭعالدىردى
بۇل ادەبي سايىسقا ا. ماكارەنكو اتىنداعى 41№ مەكتەپ ليتسەيىنىڭ وقۋشىسى ارينا الەكساندروۆا دا قاتىسىپ، «قامبار باتىر» جىرىن جاتقا ايتقان.
اتالمىش مەكتەپتىڭ قازاق تىلى مەن ادەبيەتى ءپانىنىڭ مۇعالىمى سايرامكۇل ەتەكباەۆا ورىس قىزىنىڭ قازاق ادەبيەتىنە دەگەن قىزىعۋشىلىعى ەرەسەن ەكەنىن ايتادى.
«كەيدە ءارتۇرلى سەبەپتەرمەن جۇمىسقا كەلە الماي قالعان مۇعالىمدەردىڭ ورنىنا ساباققا كىرۋگە تۋرا كەلەدى. سونداي كەزدەردىڭ بىرىندە ارينا كوزىمە ءتۇستى. ايتپەسە، مەن وعان ساباق بەرگەن ەمەسپىن. ارينا - ۇنەمى سوزدىك قورىن بايىتىپ، ءبىلىم كوكجيەگىن كەڭەيتىپ وتىراتىن ىزدەنىمپاز وقۋشى. قازىر ول قازاقتىڭ كونە سوزدەرىنىڭ ءمان-ماعىناسىن كىتاپ وقۋ ارقىلى تۇسىنۋگە تالپىنىپ ءجۇر. جاستاردى وتان سۇيگىشتىككە تاربيەلەيتىن جىرلاردى، ولەڭدەردى قۇربىلارىنا جاتقا وقىپ بەرگەندى دە جانى سۇيەدى»، - دەيدى ۇستاز.
وسى مەكتەپتە وقيتىن اعايىندى يۆان مەن اناتولي دەنيسەنكولاردىڭ دا تىلدى جەتىك مەڭگەرۋىنە قازاقى ورتادا وسكەندىگى اسەر ەتسە كەرەك.
«كىشكەنتايىمنان قازاق بالالارىمەن بىرگە ويناپ وسكەندىكتەن، ماعان ورىس سىنىبىنان گورى قازاق سىنىبىندا بىلىم العان وڭاي بولدى. سودان ەكىنشى سىنىپتان باستاپ قازاقشا وقىدىم. بيىل 11- سىنىپتى ءتامامدايمىن. جاقىندا رەسەيدەگى كەمەروۆ اتىنداعى تەحنيكالىق ۋنيۆەرسيتەتتەن عالىمدار كەلىپ، بايقاۋ وتكىزدى. سايىستا وقۋ ورنىنىڭ گرانتىن جەڭىپ الدىم. ەندى شەتەلدە بىلىمىمدى جەتىلدىرىپ، تۋعان جەرگە قايتا ورالاتىن بولامىن. ويتكەنى، مەن ءوزىمنىڭ بولاشاعىمدى تەك قازاقستانمەن عانا بايلانىستىرا الامىن»، - دەيدى يۆان.
اناتوليدىڭ دە قازاق سىنىبىنا بارۋىنا اعاسى يۆان تۇرتكى بولعان ەكەن. قازىر ول 8-سىنىپتا وقيدى. سايرامكۇل ەتەكباەۆا قازاق تىلىن تەرەڭىرەك بىلۋگە ۇمتىلعان جاس وسپىرىمدەردىڭ باسىن قوسىپ، ولارعا قوسىمشا فاكۋلتاتيۆتىك ساباقتار وتەدى ەكەن. قازىر ونىڭ توبىندا قازاق ادەبيەتىنە ەرەكشە قىزىعۋشىلىق تانىتاتىن 15 وقۋشى بار. ساباقتان تىس ۋاقىتتا سول بالالارمەن بىرگە قازاقتىڭ اقىن-جازۋشىلارى مەن جىرشى-جىراۋلارى جايلى دەرەكتەردى وقىپ، ولاردىڭ ولەڭدەرىن جاتتايدى.
