پلانشەت ۇستاعان زاماندا ءداستۇردى جاستار كىتاپتان وقىسىن - ەسبولات ايدابوسىن
قالىڭ وقىرمانعا جول تارتقان تۋىندىلار تىكەلەي وبلىس باسشىنىڭ قولداۋىمەن جارىق كوردى، دەپ حابارلايدى قازاقپارات ءتىلشىسى. ونىڭ ىشىندە تانىمال جۋرناليست، «التىن قالام»، «التىن توبىلعى» سىندى بىرنەشە رەسپۋبليكالىق بايقاۋلاردىڭ يەگەرى ەسبولات ايدابوسىننىڭ دا كىتابى بار.
اۆتوردىڭ «سۇلىكقارا» اتتى جيناعى ونىڭ العاشقى تۋىندىسى. سويلەم قۇراۋدا سۇرىنبەيتىن، وزىندىك ستيلى بار اۆتور بۇل كىتاپتا ماقساتتى تۇردە، كەلەر ۇرپاق ءۇشىن جازىلعان شىعارمالار بار ەكەنىن جەتكىزدى. «سۇلىكقارا»- تۇڭعىش كىتابىم.
مەن 2012 -جىلدان بەرى اڭگىمە- حيكاياتتار جازىپ كەلەمىن. مۇندا سول اڭگىمەلەر مەن حيكاياتتار توپتاستىرىلعان. ماسەلەن «سۇلىكقارا» شىعارماسى بالالارعا ارنالعان. شىنايى ومىرمەن بايلانىسقان. ول جەردە بالالىق بار، تازالىق بار.
ءبىر جىلدارى «دارابوز» دەگەن رەاليتي- شوۋ باعدارلاماسىن كورىپ وتىرسام، وعان قاتىسۋشى جىگىتتەر اتتىڭ مىنەر جاعى مەن قامشىلار جاعىن اجىراتا الماي جاتتى. ماعان سول كەزدە وي كەلدى. ءبىز تايعا ءمىنىپ، بايگەگە قاتىسقان ۇرپاقپىز عوي، وسىنى كەلەر ۇرپاققا جازىپ قالدىرۋ نەگىزگى ماقساتىم بولدى. قازىر اتتىڭ ورنىنا ماشينا ءمىنىپ، قامشىنىڭ ورنىنا ايفون، پلانشەت ۇستاعان زاماندا ولار ءداستۇردى كىتاپتان وقىسىن دەگەن ويمەن جازدىم.
ماسەلەن «قامشى ۇستار» اتتى شىعارمامدا قامشىنىڭ جاسالۋ تەحنولوگياسى، «قىزىل ساقادا» اسىق ويىنى جايلى جازىلعان. ءاربىر جازۋشى بالالار ادەبيەتىنە قالام تارتۋ كەرەك دەپ بىلەمىن. ويتكەنى بۇگىن بالالار ادەبيەتىن وقىپ وسپەگەن ۇرپاق، ۇلكەن رومانداردى، تاريحي دۇنيەلەردى وقىمايدى. سوندىقتان ءبىز وسى باستان ءوز وقىرماندارىمىزدى تاربيەلەۋ كەرەكپىز»، - دەيدى ەسبولات ايدابوسىن.
سونداي-اق «جەتىسۋ جازۋشىلارىنىڭ انتولوگياسى» جارىق كوردى. تۇڭعىش رەت وقىرمانعا جول تارتقان جيناقتىڭ پروزا جانرى بويىنشا قۇراستىرۋشى ەسبولات ايدابوسىن. انتولوگياعا 20-45 جاس ارالىعىنداعى جەتىسۋلىق قالامگەرلەردىڭ شىعارمالارى توپتاستىرىلعان. پروزا جانرى بويىنشا 34 اۆتوردىڭ شىعارماسى كىتاپقا ەنگەن. «جەتىسۋ جازۋشىلارىنىڭ انتولوگياسىن» جىل سايىن كەزەڭ- كەزەڭىمەن شىعارىپ وتىرۋ جوسپارىمىزدا بار»، - دەيدى ە. ايدابوسىن.
سونداي-اق بۇل كەشتە، ە. ءجۇنىس، ج. نەمەرەبايەۆ، ن. بەكتەمىروۆا، سونداي-اق «حابار» تەلەارناسىنىڭ الماتى وبلىسىنداعى مەنشىكتى ءتىلشىسى ءادىلحان ساحاريەۆتىڭ دە كىتاپتارىنىڭ تۇساۋى كەسىلدى. جالپى، وبلىس اكىمىنىڭ قولداۋىمەن 2006-2016 -جىلدار ارالىعىندا «مادەني مۇرا» باعدارلاماسىنىڭ اياسىندا 327 اۆتوردىڭ 402 ميلليون 597 مىڭ تەڭگەگە 281838 كىتابى شىعارىلدى.
