پاۆلودار وبلىسىندا اقساقال تۋريستەردى قابىلداۋ ءۇشىن ەتنواۋىل قۇرماق
بۇل تۋرالى pavlodarnews.kz حابارلايدى.
اۋىل تۇرعىنىنىڭ ايتۋىنشا، الداعى ماۋسىم ايىنىڭ بىرىنەن باستاپ، كول جاعاسىنا تۋريستەردى قابىلداۋ ءۇشىن بەس كيىز ءۇي ورنالاستىرۋ جوسپارلانعان.
«ماقساتىمىز - باياناۋىلدىڭ تابيعاتىن قورعاۋ، ۇلتتىق ءتۋريزمدى دامىتۋ. وزدەرىڭىز بىلەسىزدەر، وڭىرىمىزگە شەتەلدەن جانە ەلىمىزدىڭ باسقا وبلىستارىنان كەلگەن ساياحاتشىلاردىڭ كوبى جاسىباي كولىنە بارادى. رەسمي دەرەكتەرگە سۇيەنسەك، مۇندا ءبىر جىلدا جازدىڭ ءۇش ايىندا 150-200 مىڭ ادام كەلەدى ەكەن. ءبىراق جاسىبايداعى دەمالىس ايماعىنىڭ كولەمى بويىنشا 35-40 مىڭنان ارتىق ادام قابىلداۋعا بولمايدى. دەمەك، بۇل شامادان 4-5 ەسەگە ارتىق قابىلداپ جاتىرمىز دەگەن ءسوز. مۇنداي جاعداي تابيعاتقا كەرى اسەرىن تيگىزىپ، كولدىڭ سۋىنىڭ بۇزىلۋىنا، لايلانۋىنا اكەپ سوعادى. سوندىقتان ساياحتاشىلاردى باياناۋىلدىڭ اۋماعىنداعى باسقا كولدەر مەن دەمالىس ايماقتارىنا تارتۋىمىز كەرەك»، - دەيدى جۇماگەلدى دۇيسەكەيەۆ.
جۇماگەلدى اقساقالدىڭ سوزىنشە، كول جاعاسىنا قۇرىلاتىن كيىز ۇيلەردىڭ ۇشەۋى قوناقجاي ءۇي رەتىندە جۇمىس ىستەيدى. ياعني، كەلگەن ساياحاتشىلاردىڭ كۇندىز كىرىپ دەمالۋىنا، ءشاي- تاماق ىشۋىنە ارنالادى. ال، قالعان ەكى كيىز ءۇيدىڭ ءبىرى قازاقتىڭ ۇلتتىق تاعامى ناسيحاتتالسا، ەكىنشىسىنە ۇلتتىق ارحەولوگيالىق بۇيىمدارىمىز كورمەگە قويىلادى.
سونىمەن قاتار، ەتنواۋىلعا كەلگەن قوناقتاردى كاتامارانمەن، ۆەلوسميپەدپەن جانە اتپەن قىدىرتۋ قىزمەتتەرى كورسەتىلەدى. ونەرپازدار ۇلتتىق ونەر جانە ويىن تۇرلەرىن دە ۇسىنادى. جوسپار بويىنشا ەتنواۋىلدى ماۋسىم ايىنىڭ بىرىنە دەيىن ورناتىپ، حالىقارالىق بالالاردى قورعاۋ كۇنى مەرەكەسىنە وراي اشىلۋ سالتاناتى وتەدى.
«پاۆلودارداعى بىرنەشە تۋريستىك فيرمامەن كەلىسىمشارتقا وتىردىق. ولار الىس- جاقىننان كەلگەن ساياحاتشىلاردى بىزگە الىپ كەلەتىن بولادى. تاپسىرىستى الدىن الا قابىلدايمىز. ياعني، قانشا ادام قانشا كۇن بولادى جانە قانداي تاعام ازىرلەۋ كەرەك دەگەندى ءبىر كۇن بۇرىن ايتىپ قويۋ كەرەك. تۋريستىك ورتالىقتا قوناقتارعا قىزمەت ەتۋ ءۇشىن 8-10 ادامدى جۇمىسقا شاقىرۋدى كوزدەپ وتىرمىز دەيدى»، - كاسىپكەر اقساقال.
