اسەت يسەكەشيەۆ استانا جۇرتىن مادەنيەتتى بولۋعا شاقىردى

«دوستار، قالامىزدا «Smile Astana» جوباسىن باستايىق جانە استانا تۇرعىندارىنىڭ ەرەجەسىن جاسايىق. ءبىر- بىرىمىزگە جىلى لەبىز ءبىلدىرىپ جۇرەيىك، قارتتارعا كومەكتەسىپ، كەزەكتە ەگدە كىسىلەرگە، بولاشاق انالارعا جول بەرەيىك. ءبىر- بىرىمىزگە سىيلاستىق تانىتاتىن بولايىق»، - دەدى قالا باسشىسى «جاستار جالىنى-2017 فەستيۆالىنىڭ سالتاناتتى راسىمىندە.

ونىڭ سوزىنشە، بۇل استانادا قولعا الىنعالى جاتقان جالعىز جوبا ەمەس. نۇرسۇلتان نازاربايەۆتىڭ رەفورمالارى اياسىندا ەلوردادا «استانا - جوعارى مادەنيەتتى قالا» اتتى جوبا دا ىسكە اسىرىلماق.

«بىزگە مەيرامحانالاردا، قوناق ۇيلەردە، قوعامدىق كولىكتە، مادەني ورىنداردا ءوزىن- ءوزى ۇستاۋ مادەنيەتىن دامىتۋ قاجەت. بىزگە استانانى مادەني ورتالىقتاردىڭ بىرىنە اينالدىرۋ كەرەك»، - دەدى ول.

تاعى ءبىر جوبا «استانا - ەڭ تازا قالا» دەپ اتالادى. ەلوردا اكىمى جاستاردى قالادا تازالىق ساقتاۋعا شاقىردى.

 «ءبىز قوقىسقا قارسى كۇرەس جۇرگىزۋىمىز كەرەك. جاستارعا وسىنداي ۇستانىمدى بەرىك ۇستانعان ءجون. ءاربىر تۇرعىن، ءاربىر ستۋدەنت، ءاربىر دۇكەن وزىنەن باستاسىن. بىزدە سەنبى كۇنى سەنبىلىككە شىعۋدىڭ جاقسى ءداستۇرى ساقتالعان. وسى سەنبىدە جالپى قالالىق سەنبىلىك وتەدى. سىزدەردى وسى شارانى قولداۋلارىڭىزدى سۇرايمىز»، - دەپ اتاپ ءوتتى اكىم.

سونىمەن قاتار اسەت يسەكەشيەۆ ەلوردانى دەنى ساۋ ءارى سپورتپەن شۇعىلداناتىن ادامداردىڭ قالاسىنا اينالدىرۋدى جوسپارلاپ وتىرعاندىعىن جەتكىزدى.

«ءبىز بارلىق استانالىقتاردى سپورتقا تارتىپ، زياندى ادەتتەردەن ارىلۋعا شاقىرۋىمىز كەرەك. مەن جاقىندا رەسپۋبليكا داڭعىلىمەن كەلە جاتىپ، بۇرىن تۇنگى كلۋب بولعان عيماراتتا فيتنەس- كلۋب اشىلعانىن كورىپ، قاتتى قۋاندىم»، - دەدى اكىم.

اسەت يسەكەشيەۆ استانادا اقىلدى تەحنولوگيالار ەنگىزىلەتىنىن دە حابارلادى.

ونىڭ پىكىرىنشە، استانا قارقىندى دامىپ جاتقان تەحنولوگيالاردى بەلسەندى يگەرۋى ءتيىس.

«ءبىز وسى ماسەلەدە 6 باعىت بويىنشا، 20 جوبانى قولعا الماقپىز. ولار استانانىڭ ءبىزدىڭ ايماقتا العاشقى اقىلدى قالا اتانۋىنا سەپتىگىن تيگىزەدى»، - دەدى قالا باسشىسى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى