اقىن: فيلمدەگى قازاقتاردىڭ قازاقشاعا ۇقسامايتىن ءتىلى مەن قىلىعى ايتارعا ۇيالارلىق دەڭگەيگە جەتتى
مەيىرحان اقداۋلەت ۇلى بۇلاي دەپ «ادەبيەت پورتالىنا» بەرگەن كولەمدى سۇحباتىندا مالىمدەگەن.
«ءبىزدىڭ ب ا ق دەڭگەيى وتە تومەندەپ كەتتى. سىن مۇلدە جوق. سىن تۇگىلى، ءتورت اياعىن تەڭ باسقان، ساۋاتتى اناليتيكا جوق ب ا ق- تا. قازاق تەلەديدارى وتە جەڭىلتەكتەنىپ، «ايدا، شاپتان» وزگەنى بىلمەيتىن اتقوسشىسىنىڭ دەڭگەيىنە ءتۇستى. سوسىن، كوشىرمەنىڭ. جۇمەكەن ايتادى عوي «كەي جۇرتتاردىڭ قۇدايى دا - كوشىرمە» دەپ، سولاي بوپ تۇر. تەلەديدار رەسەيدىڭ ناشار جوبالارىنىڭ «ا ليا قازاق» تۇرىنە اينالىپ بولدى، ءتىپتى، قويانبايەۆتىڭ باعدارلاماسى « ءوزى ايتىپ، ءوزى عانا كۇلەتىن»، انەكدوتتاعى چۋكچا دارەجەسىنە ءتۇستى، ال فيلمدەردىڭ دارىنسىزدىعى، قازاقتارىنىڭ قازاقشاعا ۇقسامايتىن ءتىلى مەن قىلىعى ايتارعا ۇيالارلىق دەڭگەيگە جەتتى. تەك «بالاپانعا» عانا «شۇكىر» دەپ وتىرا بەرەمىز.
وسىنداي جاعدايدا ءبىز قالاي رۋحاني تۇلەمەكپىز؟ ب ا ق ەڭ الدىمەن قازاق ءتىلىن بۇزىپ سويلەپ، نادان توبىردى سول مۇگەدەك تىلگە ۇيرەتىپ وتىرسا، قازاقى سەريالدىڭ ءوزى وتە جاساندى، اقىماق قانا يلانارلىق دارەجەدەگى «وڭاي» دەڭگەيگە كوشسە؟ مۇنى تۇسىنۋگە دە بولادى - تەلەديدار وڭاي اقشا جاساۋعا كوشتى: جوبانى تەز يگەرۋ كەرەك!.. مۇنى كورگەن قازاقى كورەرمەن نە كۇيدە وتىر؟ ءدال وسى دەڭگەي قازاققا لايىق پا؟ الدە، تەلەبوسستاردىڭ كاسىبي، ينتەللەكتۋالدىق، بىلىكتىلىك دەڭگەيىنىڭ جەتكەن جەرى وسى ما؟ .. ءبارىن «چۋكچاعا جارايدى وسى...» دەڭگەيىنە نەگە تۇسىردىك؟ مىنا كورەرمەن (قازاق!) سول تەلەديدارداعىلاردان تومەن دەڭگەيدە مە؟ مۇنى جاڭا باسشىلار دا ويلامايدى- اۋ دەيمىن» دەپ اشىنا سويلەپتى اقىن.
