جەرگىلىكتى بيلىك شەت ءتىلىن بىلۋگە مىندەتتەلۋى مۇمكىن
سونىڭ ءبىرى - جەرگىلىكتى بيلىكتىڭ ءتىل بىلمەۋى، دەپ حابارلايدى قازاقپارات ءتىلشىسى.
«قازىرگى كەزدە ءبىز ۇلتتىق ينۆەستيتسيالىق ستراتەگيانى ازىرلەپ جاتىرمىز. ول دا - پرەزيدەنتتىڭ تاپسىرماسى. وسى جۇمىسقا حالىقارالىق ساراپشىلار تارتىلىپ وتىر. سونداي-اق، ءبىز ءوزىمىزدىڭ ايماقتاعى ارىپتەستەرىمىزگە وسى ماسەلەنىڭ ماڭىزدىلىعىن تۇسىندىردىك. سەبەبى ءدال سول ايماقتاردا كوپتەگەن ماسەلەلەر تۋىندايدى. ەندى، ءبىز، ۇكىمەتتە وتىرعاندار، ينۆەستيتسيالىق ساياساتتى وزگەرتۋدىڭ قاجەتتىلىگىن جاقسى تۇسىنەمىز. سول سەبەپتى وسى سالاداعى جۇمىستىڭ ايماقتاردا تۇرالاپ قالعانىن قالامايمىز. سوندىقتان وبلىس اكىمدەرىنىڭ ينۆەستيتسيالار جونىندەگى ورىنباسارلارىمەن قوسىمشا كەڭەستەر وتكىزدىك. ءبىز كەيبىر باسشىلاردىڭ وسى سالادا جۇمىس ىستەۋگە ءالى دە دايىن ەمەس ەكەنىن بايقادىق. ءتىلدى ءتيىستى دەڭگەيدە بىلمەيتىندەرى دە كوپ نارسەنى اڭعارتادى. ءيا، ولاردىڭ باسقا دا جۇمىستارى دا جەتىپ ارتىلادى. ونى دا بىلەمىز. وسىعان بايلانىستى ءبىز پرەزيدەنت اكىمشىلىگىنە ءتيىستى حاتتى ازىرلەپ جاتىرمىز. ينۆەستيتسيالاردى تارتۋ جۇمىسىن رەتكە كەلتىرۋ كەرەك»، - دەدى ساعىنتايەۆ بۇگىن قازاقستاننىڭ ينۆەستيتسيالىق الەۋەتىن تانىستىرۋعا ارنالعان شارادا.
اتالعان شارادا ق ر ينۆەستيتسيالار جانە دامۋ ءمينيسترى جەڭىس قاسىمبەك پەن «Kazakh Invest» ۇلتتىق كومپانياسىنىڭ باسشىلىعى شەت مەملەكەتتەردىڭ ەلشىلەرىنە ينۆەستيتسيالاردى تارتۋ، شەتەل ينۆەستورلارىنا ىڭعايلى جاعداي جاساۋ سالاسىنداعى جۇمىستار جايىندا بايانداپ بەردى.
پرەمەر-ءمينيستردىڭ ايتۋىنشا، بۇگىندە شەتەل ينۆەستيتسيالارىن تارتۋدىڭ بۇرىنعى جۇيەسى تولىعىمەن وزگەرتىلدى.
وسى سالادا ارنايى «Kazakh Invest» ۇلتتىق كومپانياسى قۇرىلدى. ال كومپانيانىڭ ديرەكتورلار كەڭەسى ۇكىمەت باسشىسى دارەجەسىنە دەيىن كوتەرىلدى. «كەڭەستىڭ ءتوراعاسى مەن بولامىن. ءبىز ديرەكتورلار كەڭەسىنىڭ مارتەبەسىن ادەيى كوتەردىك. سونىڭ ءوزى ينۆەستيتسيالىق ساياساتتىڭ باسىمدىعىن، قازاقستان ءۇشىن قانشالىقتى ماڭىزدى ەكەنىن كورسەتسە كەرەك»، - دەپ اتاپ كورسەتتى ساعىنتايەۆ.
