داريعا نازاربايەۆا: پرەزيدەنتتىك تەستىلەۋ ۇرەي تۋدىرماۋى ءتيىس

سەناتتىڭ جالپى وتىرىسىندا «دەنە تاربيەسى جانە سپورت ماسەلەلەرى بويىنشا ق ر- دىڭ ءبىرقاتار زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسى تالقىلانىپ، ەكى وقىلىمدا قابىلداندى.

«كوپتەگەن سپورتشىلار، ونىڭ ىشىندە كاسىبي سپورتشىلار پرەزيدەنتتىك تەستىلەۋ وتە قيىن ەكەنىن ايتۋدا. سوڭعى جىلدارى دەپۋتاتتار بىرنەشە رەت پرەزيدەنتتىك تەستىلەۋدى قيىندىق دارەجەسىنە قاراي بىرنەشە ساناتقا ءبولۋ تۋرالى ۇسىنىستاردى كوتەرگەن بولاتىن. بۇل قادام ادامداردىڭ سپورتتان الشاقتاماۋىنا، اتالعان تەستىلەۋ الدىندا ۇرەي تۋعىزباس ءۇشىن قاجەت»، - دەپ توقتالدى سەناتور.

ونىڭ سوزىنە قاراعاندا، دەپۋتاتتار مادەنيەت جانە سپورت مينيسترلىگىنە ق ر قارجى مينيسترلىگىمەن بىرلەسە كاسىبي، مامانداندىرىلعان جانە بۇقارالىق سپورتتى قارجىلاندىرۋ بويىنشا بيۋجەتتىك باعدارلامالاردى ءبولۋ ماسەلەسىن قاراستىرۋدى ۇسىنىپ وتىر.

سونىمەن قاتار كاسىبي سپورت كلۋبتارىنا، بالالار مەن جاس وسپىرىمدەر سپورت مەكتەپتەرىنە سالىقتىق جەڭىلدىكتەر ۇسىنعان ابزال. مۇنىمەن قوسا، سپورت ساناتتارى بويىنشا پايىزدىق دەڭگەيدە بيۋجەتتەن قارجىلاندىرۋ كولەمىن ايقىنداۋ ماسەلەسى اتاپ ءوتىلدى. بۇل تۇرعىدا بۇقارالىق سپورتقا 30 پايىزدان كەم ەمەس دەڭگەيدى بەلگىلەۋ ەسكەرىلگەن.

د. نازاربايەۆا مەكتەپتەردە سپورتقا باۋلۋ ساباقتارىندا بىركەلكىلىك جوق ەكەنىن اتاپ ءوتتى. وسى ورايدا مەكتەپتە سپورتتى دامىتۋدىڭ باعدارلاماسىن ازىرلەۋ مەن سپورت تۇرلەرى بويىنشا ءتىزىمدى بەكىتۋ ۇسىنىلدى.

بەلگىلى بولعانداي، مەكتەپتەردىڭ 60 پايىزىندا دەنە شىنىقتىرۋ بويىنشا ساعاتتار سانىن ارتتىرۋ ءۇشىن جاعداي جوق. سوندىقتان دا جەكە بيزنەستى تارتا وتىرىپ، سپورتتىق ينفراقۇرىلىمدى دامىتۋدىڭ بولەك باعدارلاماسى قاجەت بولىپ تۇر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى