ا ق ش تۇركياعا ريزا ەمەس

كەشە تۇركيانىڭ اۋە كۇشتەرى سيريا جەرىندەگى كۇردتەرگە قارسى سوققى بەردى. وتىزدان اسا ادام قازا تاپتى. ارينە ولاردىڭ ءبارى كۇرد قارۋلى توپتارىنىڭ مۇشەلەرى. الايدا اق ءۇي بۇعان نارازى.

بىرىنشىدەن ا ق ش كۇردتەرمەن ىمىرالاسا وتىرىپ، ولاردى سول ايماقتا ارەكەت ەتىپ جاتقان لاڭكەستىك توپتارعا، سونىڭ ىشىندە «يسلام مەملەكەتى» سودىرلارىن قۇرتۋعا يتەرمەلەپ وتىر.

بۇعان كۇردتەر قارسى ەمەس. كەرىسىنشە، لاڭكەستەردەن ازات ەتىلگەن ايماقتا ا ق ش- تى پايدالانا وتىرىپ تاۋەلسىز اۆتونوميا قۇرۋعا ۇمتىلۋدا. ەكىنشىدەن، تۇركيا اۋەدەن سوققى بەرگەن ايماقتا كۇرد جاساقتارىن سوعىس ونەرىنە ۇيرەتىپ جاتقان ا ق ش ماماندارى بار.

ءتىپتى ا ق ش ارناۋلى بولىمدەرىنىڭ مىڭعا تارتا جاساعى دا وسىندا. الايدا، پەنتاگوننىڭ تاراتقان حابارىنا قاراعاندا، امەريكالىق جاۋىنگەرلەردىڭ ەشقايسىسى زارداپ شەكپەگەن.

ءبىراق اق ءۇيدىڭ انكاراعا قاراتا ايتقان ايىبى، «تۇركيا سوققى بەرەر كەزدە پەنتاگونعا حابار بەرمەگەن. مۇنداي جاعدايدا ا ق ش اسكەريلەرى بومبانىڭ استىندا قالۋى مۇمكن ەدى. بۇل دۇرىس ەمەس» دەگەنگە سايادى.

ال انكارا كەرىسىنشە «سول ايماقتاعى اسكەر قوسىنىنا حابار تاراتتىق» دەسەدى.

ەكى ەل اراسىنداعى تۇسىنىسپەۋشىلىكتىڭ ارتى نەگە اپارىپ سوقتىرارى بەلگىسىز. دەگەنمەن، مامىر ايىنىڭ ورتاسىندا تۇركيا پرەزيدەنتى ەردوعان ا ق ش- قا بارىپ، دونالد ترامپپەن كەزدەسپەك.

بالكىم، سول كەزدە بۇل ماسەلەنى ءبىر جاقتى ەتە جاتار. وسى تۇستا تاعى ءبىر ەسكەرە كەتەتىن جايت، ەردوعاننىڭ ايتۋىنشا، سيريا جەرىندە جۇرگىزىلگەن «ەۆفرات قالقانى» وپەراتسياسىنىڭ ەكىنشى بولىگى يراكتا جالعاسىپ، سينجار ايماعىندا تۇرىپ جاتقان اتالاستارى تۇركىمەندەردى كۇرد پەن لاڭكەستەردىڭ الىمجەتتىگىنەن قورعاماق.

اينۇر قازىكەنوۆا

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى