ماڭعىستاۋدا قىرىلعان ءيتبالىقتاردان الىنعان سىنامالار استاناعا جىبەرىلەدى

بۇل تۋرالى وبلىستىق ەكولوگيا دەپارتامەنتىنىڭ باسشىسى اباي سافين ءمالىم ەتتى، دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.

ەكولوگيا دەپارتامەنتىنىڭ قىزمەتكەرلەرى فورت-شەۆچەنكو ماڭايىنداعى جاعالاۋ القابىندا قاشىقتىعى 500 مەتردەي ءۇش جەردەن سۋ مەن اۋانىڭ سىنامالارىن تالداۋ جاساۋعا الدى. سۇرىپتاۋ ناتيجەسىندە اتموسفەرالىق اۋانىڭ جانە سۋدىڭ نورمادان ارتىق بولۋى انىقتالمادى.

ءتۇپقاراعان اۋدانى اكىمىنىڭ وكىمىمەن قۇرامىندا توتەنشە جاعداي ءبولىمىنىڭ، ەكولوگيا دەپارتامەنتىنىڭ، ورمان شارۋاشىلىعى مەن جانۋارلار دۇنيەسى اۋماقتىق ينسپەكسياسىنىڭ، اۋماقتىق ۆەتەريناريا ينسپەكسياسىنىڭ وكىلدەرى بار ارنايى كوميسسيا قۇرىلدى. ماڭعىستاۋ وبلىسىندا تەڭىز فاۋناسىن زەرتتەيتىن ورتالىقتىڭ بولماۋىنا بايلانىستى اۋداندىق اۋىل شارۋاشىلىعى مەن ۆەتەريناريا بولىمىمەن الىنعان سىنامالار استانا قالاسىنداعى عىلىمي- رەفەرەنتتىك- زەرتتەۋ ورتالىعىنا جولداندى.

كاسپي تەڭىزىنىڭ فورت- شەۆچەنكو قالاسى اۋماعىندا جاعالاۋعا شىعىپ قالعان ءيتبالىقتاردىڭ ولەكسەلەلەرى ەسكىرىپ كەتكەن، كوپشىلىگىنىڭ تەرىلەرى بۇلىنگەن، دەنەلەرى تەسىلگەن، تولىقتاي نەمەسە جارتىلاي زاقىمدانعان، شىرىگەن. 26 -ءساۋىر كۇنى تەرىسى زاقىمدانباعان ءبىر باس ءيتبالىقتى ءتۇپقاراعان اۋداندىق ۆەتەريناريالىق ستانسانىڭ ۆەتەرينارلارى جارىپ كورگەن. جانۋاردىڭ ىشكى ورگاندارى تولىقتاي ءشىرىپ كەتكەندىگى انىقتالدى. مۇنداي جاعدايداعى ولەكسەلەردەن دياگنوستيكالىق زەرتحانالارعا جولداۋعا جارامدى سىناما الۋ مۇمكىن ەمەس.

فورت-شەۆچەنكوعا ق ر اۋىل شارۋاشىلىعى مينيسترلىگىنىڭ تاپسىرىسى بويىنشا كاسپي تەڭىزىندە زەرتتەۋ جۇمىستارىمەن اينالىساتىن الماتىداعى «ميكروبيولوگيا جانە ۆيرۋسولوگيا عىلىمي- زەرتتەۋ ينستيتۋتى» قىزمەتكەرلەرىنىڭ كەلۋى كۇتىلۋدە.

انىقتاۋ جۇمىستارى ءارى قاراي وسى ينستيتۋتتىڭ عىلىمي قىزمەتكەرلەرمەن بىرلەسىپ جۇرگىزىلەتىن بولادى. كوممۋنالدىق مەكەمە قىزمەتكەرلەرىمەن ءيتبالىقتاردىڭ ولەكسەلەرىن جيناپ، ارنايى پوليگوندا جويۋدا.

«مەنىڭ ويىمشا، بۇل جانۋارلار تەڭىزدەگى زياندى زاتتاردان ولگەن جوق. مۇندا سەبەپ مۇلدەم باسقا. قازىر كۇن جىلىنىپ، سولتۇستىك كاسپيدەگى مۇز ەرىپ جاتىر. ءيتبالىقتاردىڭ ولىكتەرى مۇزدا قالىپ، داۋىل بولعاندا تەڭىز تولقىنىمەن جاعالاۋعا لاقتىرىلعان. ءبىراق ولاردىڭ ءولىمىنىڭ ناقتى سەبەبى ءالى بەلگىسىز. تابىلعان ءيتبالىقتاردا تورلاردىڭ ىزدەرى بولۋىنا بايلانىستى ولاردى براكونەرلەر ۇستاپ الىپ، ءولتىرۋى دە ىقتيمال»، - دەدى «ەكو ماڭعىستاۋ» ۇكىمەتتىك ەمەس ۇيىمنىڭ ديرەكتورى كيريلل وسين.

ءتۇپقاراعان اۋدانىنىڭ ۆەتەريناريا ستانسياسى قىزمەتكەرلەرى جاعالاۋدا تەكسەرۋ جۇمىستارىن جالعاستىرۋدا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى