ديماش بارشا جاستاردى قازاقتىڭ اتىن الەمگە پاش ەتۋگە شاقىردى
ءوز سوزىندە الەمگە ايگىلى جاس ءانشى بارشا ونەرسۇيەر جەرلەستەرىنە العىس ايتىپ، پرەزيدەنت سياقتى قازاق حالقىن دۇنيەجۇزىنە تانىتۋعا كۇش سالاتىنىن جەتكىزدى.
«ءسىز قازاق ەلىن الەمگە تانىتتىڭىز، ونەرىم ارقىلى، ءانىم ارقىلى قازاقتىڭ بولمىسىن، تابيعاتىن، وشپەس تاريحىن، اتا- بابالارىمىز اۋەلەتىپ كەتكەن حالىق اندەرىن الەم ساحنالارىندا ورىنداۋ، شارىقتاتۋ مەنىڭ باستى ماقساتىم بولدى، بولادى دا. قازىرگى تاڭدا الەمنىڭ قاي تۇكپىرىندە، قانداي الەم ساحنالارىندا ونەر كورسەتسەم دە، قازاق دەگەن ءور تۇلعاسى كەلىسكەن ەرەكشە ءبىر ەلدەن كەلدىم دەپ ماقتانىپ ايتامىن. كەرەگەسى كەڭ، كىممەن دە بولسا تەرەزى تەڭ ەلىمىزدىڭ بولاشاعى جاستاردىڭ قولىندا دەپ ءوزىڭىز ايتقان بولاتىنسىز. قازىرگى كەزدە ورەسى بيىك جاستار ءۇشىن ۇلكەن ستراتەگيامەن ەلىمىزدى الەمگە تانىتۋعا بارلىق مۇمكىندىكتەر جاسالدى. وسى ورايدا بارشا جاستاردى قازاقتىڭ اتىن كۇللى الەمگە پاش ەتۋگە شاقىرامىن»، - دەدى ديماش قۇدايبەرگەن.
سوسىن ءوز ءسوزىن ول «سان عاسىرلار تاريحىنان كەشەگى، تۋعان ەلدىڭ شەجىرەسى ەسەدى. مەنىڭ ەلىم قازاقستانىم، وتانىم، بولاشاعى بىزبەن بىرگە وسەدى» دەگەن ولەڭ شۋماقتارىمەن اياقتادى.
ايتا كەتەيىك، سەسسيادا پرەزيدەنت مەملەكەتتىڭ دامۋىنا كەدەرگى جاسايتىن ماسەلەلەر توڭىرەگىندە وي ءوربىتتى.
اۆتور: ارمان اسقاروۆ
